पाचोड महिलेची विहिरीत उडी घेऊन आत्महत्या

पाचोड : एका विवाहितेने विहिरीत उडी घेऊन आत्महत्या केल्याची घटना पाचोड खुर्द (ता.पैठण) येथे रविवारी (ता.१३) रोजी सायंकाळी सहा वाजेच्या सुमारास घडली.

सीमा विष्णू नागरे (वय ३०) असे आत्महत्या केलेल्या विवाहितेचे नाव असून अद्याप आत्महत्येचे कारण समजू शकले नाही. पोलिसांनी सांगितले की, सदर विवाहिता रविवारी (ता.१३) सकाळी ११ वाजेच्या सुमारास सहा महिन्यांच्या चिमुकलीसह चार वर्षीय मुलाला घेऊन शेतात गेली.

सायंकाळ झाली तरी सीमा घरी न परतल्याने कुटुंबीय व गावांतील नातेवाइकांनी शोध घेतला असता भागवत नागरे यांच्या विहिरीजवळ सहा महिन्याची चिमुकली व चार वर्षीय मुलगा दिसून आले. त्यांनी विहिरीत डोकावून पाहिले असता दोन्ही चिमुकल्यांना सोडून सीमाने विहिरीत आत्महत्या केल्याचे दिसून आले.

माहिती मिळताच पाचोड ठाण्याचे पोलिस उपनिरिक्षक सुरेश माळी, जमादार प्रशांत नांदवे यांनीही तत्काळ घटनास्थळी धाव घेऊन घटनेचा पंचनामा केला. रात्री उशिरा सदर महिलेचे पार्थिव विहिरीबाहेर काढण्यात आले. या महिलेने आत्महत्येचे पाऊल का उचलले याचे कारण समजू शकले नाही. घटनेची पाचोड पोलिस ठाण्यात अकस्मात मृत्यू म्हणून नोंद करण्यात आली. तपास सहाय्यक पोलिस निरीक्षक गणेश सुरवसे यांच्या मार्गदर्शनाखाली पोलिस कर्मचारी प्रशांत नांदवे,पवन चव्हाण करीत आहे.