पैठण : ट्रक, आयशर अपघातात एक जण ठार

पैठण : ट्रक व आयशर यांच्यात झालेल्या अपघातात एक जण ठार तर एक जण गंभीर जखमी झाल्याची घटना बुधवारी (ता.२७) दुपारी ४.३० वाजता पैठण-पाचोड मार्गावरील आखतवाडा फाट्याजवळील जायकवाडी धरणाच्या डाव्या कालव्याच्या वळण रस्त्यावर घडली. याप्रकरणी पैठण पोलिस ठाण्यात नोंद करण्यात आली आहे.

मोहनलाल मिश्रीलाल फुलवारी (वय ३२ रा.भारत नगर, गांधीधाम जि. कच्छ) असे मृत्युमुखी पडलेल्या आयशर चालकाचे नाव आहे. तर राजेंद्र रावसाहेब सुळ (वय २३, रा.खेड ता. कर्जत जि.अहमदनगर) असे गंभीर जखमी ट्रक चालकाचे नाव असून त्यांच्यावर रुग्‍णालयात उपचार सुरु आहे.

याबाबत पोलिसांनी सांगितले की, बुधवारी (ता.२७) दुपारी साडेचारच्या सुमारास पैठण-पाचोड मार्गावरील आखतवाडा फाट्याजवळील जायकवाडी धरणाच्या डाव्या कालव्याच्या वळण रस्त्यावर ट्रक (क्र.एम.एच-१६-सीसी ९९२१) आणि आयशर (क्र-जीजे १२ बी. वाय. ०१७८) या दोन वाहनांची समोरासमोर जोरदार टक्कर झाली. हा अपघात एवढा भीषण होता की, त्यात आयशरच्या केबिनचा भाग चक्काचूर झाला. तर ट्रक बाजूच्या शेतात जाऊन उलटला.

दरम्यान, या घटनेची माहिती मिळताच पोलिस निरीक्षक किशोर पवार, फौजदार रामकृष्ण सागडे, गटकुळ, पोलिस कॉन्स्टेबल एडके, चेडे, दुल्लत यांनी घटनास्थळी धाव घेतली व मृत चालक यांचा मृतदेह बाजूला काढून घटनेचा पंचनामा केला तर ट्रकचा जखमी चालक यास पैठण येथील सरकारी रुग्णालयात उपचारासाठी दाखल करण्यात आले आहे. याप्रकरणी पैठण पोलिस ठाण्यात नोंद करण्यात आली आहे.

मदतीसाठी धावले नागरिक

दरम्यान, हा भीषण अपघात पाहून परिसरातील नागरिकांनी घटनास्थळी धाव घेत मदत केली. यानंतर ठार झालेल्या चालकाचा मृतदेह काढण्यासाठी व जखमी चालकाला रुग्णालयात तातडीने हलविण्यासाठी पुढाकार घेतला. यानंतर पोलिसांनाही घटनास्थळी धाव पंचनामा केला, अशी माहिती निरीक्षक किशोर पवार यांनी दिली.