करमाड : सरकार आरक्षण देत नाही तर दुसरीकडे दोन मुलांचा शिक्षणाचा खर्च झेपत नाही, मला माफ कर...अशी चिठ्ठी लिहून अल्पभूधारक शेतकऱ्याने गळफास लावून आत्महत्या केली. ही घटना लाडसावंगी (ता. छत्रपती संभाजीनगर) येथे गुरुवारी (ता.२७) सकाळी सहाच्या सुमारास उघडकीस आली. बाबासाहेब जनार्दन पडूळ (वय ४७) असे आत्महत्या केलेल्या शेतकऱ्याचे नाव आहे.
बाबासाहेब पडूळ यांना वीस गुंठे शेतजमीन आहे. त्याच्यावर ते आपल्या कुटुंबाचा उदरनिर्वाह भागवत होते. गुरुवारी सकाळी सहा वाजता ते शेतात जनावरांना चारापाणी करण्यास जात असल्याचे सांगून गेले होते. दरम्यान, साडेसहा वाजता त्यांचे चुलतभाऊ रामू पडूळ हे दूध काढण्यासाठी गेले असता त्यांना बाबासाहेब हे लिंबाच्या झाडाला गळफास घेतल्याचे आढळून आले. त्यांनी तत्काळ घरी माहिती देऊन उपचारासाठी छत्रपती संभाजीनगर येथील घाटी रुग्णालयात नेले असता डॉक्टरांनी तपासून मृत घोषित केले. त्यांच्या पश्चात पत्नी, एक मुलगा, एक मुलगी असा परिवार आहे.
बाबासाहेब पडूळ यांना एक मुलगा व एक मुलगी आहे. मुलगी बीएस्सीच्या द्वितीय वर्षात शिक्षण घेते, तर मुलाने बारावीत ८५ टक्के गुण मिळवून तो इंजिनिअरच्या प्रथम वर्षाला प्रवेश घेण्यासाठी छत्रपती संभाजीनगर येथे गेला होता. घरी वीस गुंठे शेतीवर घर खर्च व दोन्ही मुलांचा शिक्षणाचा खर्च कसा करावा या विवंचनेत बाबासाहेब पडूळ होते, असे त्यांच्या नातेवाइकांनी सांगितले.
चिठ्ठीवर ‘एक मराठा लाख मराठा’
बाबासाहेब पडूळ यांनी ‘सरकार आरक्षण देत नाही, साहिल मला माफ कर, एक मराठा लाख मराठा’ असा उल्लेख असलेली चिठ्ठी त्यांच्या खिशात सापडली. मागील आठ महिन्यांपासून हे सरकार मराठा आरक्षण देत नाही, अर्धा एकर शेताच्या उत्पन्नावर दोघांचा खर्च, घर चालवण्याचा खर्च...साहिल मला माफ कर, असे या चिठ्ठीत मजकूर लिहिलेला आढळून आला.
ब्रेक घ्या, डोकं चालवा, कोडे सोडवा!
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.