Sambhaji Nagar Update : शहरासाठी १०० ई-बस,शासनाला पाठविला स्मार्ट सिटीने प्रस्ताव

छत्रपती संभाजीनगर - स्मार्ट सिटी अभियानामार्फत शहरात सध्या १०० शहर बस सुरू आहेत. आता केंद्र शासनाने प्रधानमंत्री ई-बस योजना सुरू केली असून, त्यासाठी देशातील १६९ शहरांची निवड करण्यात आली आहे.

त्यात छत्रपती संभाजीनगर शहराचाही समावेश असल्याने मंगळवारी (ता. १२) स्मार्ट सिटीतर्फे राज्य शासनाला १०० बसच्या मागणीचा प्रस्ताव सादर सादर करण्यात आला आहे.

शहरांचे वाढते प्रदूषण कमी करण्यासाठी शासनाने इलेक्ट्रिक वाहनांचा वापर करण्याचे धोरण अवलंबले आहे. त्यानुसार केंद्र शासनाने प्रधानमंत्री ई-बस सेवा योजना सुरू केली आहे. त्यासाठी १६९ शहरांची निवड करण्यात आली आहे.

योजनेत पीपीपी तत्त्वावर शहरांना तेथील स्थानिक प्रवासी वाहतुकीसाठी १० हजार ई-बस देण्याचा आराखडा तयार करण्यात आला आहे. निवडण्यात आलेल्या शहरांना पाच ते सहा महिन्यांत ई-बस दिल्या जाणार आहेत. या योजनेच्या लाभासाठी निवड झालेल्या शहरांनी राज्य शासनामार्फत ३० सप्टेंबरच्या आत प्रस्ताव सादर करावेत, असे आदेश देण्यात आले होते.

त्यानुसार स्मार्ट सिटी डेव्हलपमेंट कार्पोरेशनने मंगळवारी हा प्रस्ताव राज्य शासनाला केल्याचे सूत्रांनी सांगितले. या इलेक्ट्रिक बस परचेसिंग पॉवर पॅरिटी (पीपीपी) तत्त्वावर मिळणार आहे. यात केंद्र सरकार ज्या कंपनीशी करार करेल, ती कंपनी बस देणार आहे.

एक लाख लोकसंख्येमागे ६० बस

या बस १२ मीटर, ९ मीटर आणि ७ मीटर अशा आहेत. छत्रपती संभाजीनगर शहराने १२ आणि ९ मीटर लांबीच्या बसची मागणी केली आहे. बसची संख्या ठरविण्यासाठी चार सेक्टर करण्यात आले आहेत. यात २० ते ४० लाख लोकसंख्या असलेल्या शहरांना १ लाखामागे ६० बस तर छोट्या शहरांना १ लाख लोकसंख्येमागे २० ते ४० बस देण्यात येणार आहे. छत्रपती संभाजीनगर शहर १० ते २० लाख लोकसंख्येत मोडत असल्याने १०० बस मिळण्याची शक्यता आहे.

केंद्र सरकारकडून लोकसंख्येनुसार निवड झालेल्या शहरांना अनुदान मिळणार आहे. छत्रपती संभाजीनगर शहराची लोकसंख्या १० ते २० लाखांदरम्यान आहे. त्यामुळे शहराला २२ रुपये प्रति किलोमीटर एवढे अनुदान मिळण्याची शक्यता आहे.