Samruddhi Mahamarg Accident : 'समृद्धी'वर ३ दिवसांत तिसरा अपघात; कार कोसळून पतीचा मृत्यू, पत्नी मुलगा जखमी

करमाड : समृद्धी महामार्गावरून भरधाव वेगाने जालन्याकडे जाणाऱ्या चारचाकी वाहनावरील चालकाचे नियंत्रण सुटल्याने कार रोडच्या खाली जाऊन कारमधील पतीचा जागीच मृत्यू , तर पत्नी व लहान मुलगा जखमी झाला.

हा अपघात समृद्धी महामार्गावरील करमाड पोलीस ठाणे हद्दीतील जयपूर-भांबर्डा शिवारात सोमवारी (ता.तीन) पहाटे तीन वाजता घडला.सुशीलकुमार दिलीप थोरात (43, रा. मालेगाव जि. वाशिम) यांचा या अपघातात जागीच मृत्यू झाला.

श्री. थोरात हे एमएच 30 बी बी 9793 या क्रमांकाच्या चार चाकीने पत्नी व लहान मुलांसह मालेगाव येथून जालन्याच्या दिशेकडे जात असताना हा अपघात घडला. संभाजीनगर तालुक्यातील जयपूर-भांबर्डा शिवारात पहाटे सहा वाजेच्या सुमारास त्यांची

कार आली असता श्री. थोरात यांचा भरधाव वाहनावरील ताबा सुटला. यात कार महामार्गाच्या डाव्या बाजूला जवळपास 30 फूट खोल जाऊन अगदी एखादा कागद उडावा अशी जाऊन कोसळली. यात सुशीलकुमार थोरात यांचा दुर्दैवी मृत्यू झाला.

अपघाताच्या आवाजाने भांबर्डा येथील ग्रामस्थांनी घटनास्थळी धाव घेऊन करमाड पोलिसांना कळवत जखमींना बाहेर काढले. जखमी पत्नी व लहान बालकास (वय समजू शकले नाही) करमाड पोलीस ठाण्याचे बीट जमादार सुनील गोरे, दादासाहेब ढवळे यांनी उपचारासाठी संभाजीनगर येथे हलवले आहे. अपघाताची नोंद करण्याची प्रक्रिया सुरू असून पुढील तपास करमाड पोलीस करत आहे.