Chh. Sambhajinagr Crime : ‘दुसऱ्या’ लग्नाची वरात; पोलिसांच्या दारात

छत्रपती संभाजीनगर : पहिले लग्न झालेले असताना एका व्यक्तीने दुसऱ्यांदा बोहल्यावर चढण्याचा प्रयत्न केला. ही बाब पहिलीला कळताच तिने लग्नमंडपात गोंधळ घालत पतीला जाब विचारत त्याचे दुसरे लग्न रोखले. यावरून दुसरीने व तिच्या नातेवाइकांनीही लग्नमंडपात राडा करीत मध्यस्थीसाठी दामिनी पथकालाही मारहाण केली. हा प्रकार गुरुवारी (ता. २६) दुपारी निपटनिरंजन भागात घडला. या प्रकरणी बेगमपुरा पोलिसांनी पतीसह दुसरीच्या नातेवाइकांविरुद्ध गुन्ह्याची नोंद करून त्यांना अटक केली.

राममूर्ती (जि. जालना) येथील किशोर सुधाकर गिराम (वय ३०) याचे चार वर्षांपूर्वी देविका सोबत लग्न झाले होते. त्यांना तीन वर्षांची एक मुलगीही आहे. मात्र, तीन वर्षांपासून दोघांमध्ये न्यायालयात वाद सुरू आहे. पत्नी नांदायला येत नसल्याने किशोरचे पहाडसिंगपुरा परिसरातील निपटनिरंजन सोसायटीतील एका तरुणीसोबत लग्न ठरले.

गुरुवारी दुपारी पतीचे लग्न होणार असल्याचे समजताच देविका ही मुलीसह थेट लग्नमंडपात आली. त्या ठिकाणी देविकाने वधू व त्याच्या नातेवाइकांसमोर पतीला जाब विचारला. त्यावर वधू व तिच्या नातेवाइकांनी देविकासोबत भांडण करण्यास सुरुवात केली. भांडण सुरू असताना देविकाने पोलिस नियंत्रण कक्षाला कॉल करून मदतीची मागणी केली.

दामिनी पथकाच्या पोलिस उपनिरीक्षक कांचन मिरधे, एस. पी. खरात, सोनाली निकम, राणी केदार आणि कल्पना नागरे यांनी घटनास्थळी धाव घेतली. पोलिसांनी लग्न रोखण्याचा प्रयत्न करताच किशोर गिराम, वधू तिची आई आणि अन्य एकाने दामिनी पथकातील पोलिसांनाच मारहाण केली. जोराची लाथ बसल्याने सोनाली निकम खाली कोसळल्या. यामुळे तणाव निर्माण झाला होता.

पाठवला अतिरिक्त पोलिस बंदोबस्त

दामिनी पथकाला मारहाण झाल्याचे कळल्यावर बेगमपुरा पोलिसांनी घटनास्थळी अतिरिक्त बंदोबस्त पाठवला. या प्रकरणी शासकीय कामात अडथळा निर्माण करून पोलिसांना मारहाण केल्याने पोलिस कर्मचारी कल्पना नागरे यांच्या तक्रारीवरून बेगमपुरा पोलिस ठाण्यात किशोर गिराम, नियोजित वधू, तिची आई आणि अन्य एका नातेवाइकाच्या विरोधात गुन्ह्याची नोंद केली. त्यांना अटक करण्यात आली आहे.