Sambhaji Nagar News : कवडीमोल दराने कापूस विक्री

अंधारी : परिसरात कपाशीचे भाव गडगडल्याने शेतकरी वर्ग हवालदिल झाला आहे. त्यामुळे शेतकऱ्यांवर कवडीमोल दराने कापूस विक्री करण्याची वेळ आली आहे. कापूस विक्रीतून कपाशी लागवडीवर झालेला खर्च निघत नसल्याने शेतकरी चांगले आर्थिक अडचणीत सापडल्याचे दिसत आहे.

यंदा पावसाने दगा फटका दिला. त्यामुळे शेतातील कपाशी, मका, ही पिके म्हणावी तशी आली नाहीत. त्यातच कपाशीची वाढ खुंटली. त्यामुळे कपाशीच्या झाडांना कैऱ्या कमी लागल्या. त्यात तीन ते चार वेचणीत कपाशीच्या पऱ्हाट्या झाल्या

तर मका पिकांची ही तशीच अवस्था झाली. मकाला ऐन कणसे लागण्याच्या वेळेसच पावसान पाठ फिरवली. त्यामुळे मकालाही पुरेसे कणसे लागली नाहीत. त्यामुळे ही मका जनावरांसाठी कुट्टी म्हणून वापरावी लागली.

त्यातच अशा विपरित परिस्थितीत सापडलेले शेतकरी चांगलेच अडचणीत आले. आजघडीला कापूस व्यापाऱ्यांकडून ५२०० रुपये प्रतिक्विंटल दराने खरेदी केला जात आहे. परंतु कपाशी लागवड, वेचणीवर झालेला खर्च पहाता आणि घटलेले उत्पादन लक्षात घेता यातून कपाशी लागवडीचा खर्चही निघणे अवघड झाले आहे.

त्यातच उसनवारी करून कापूस लागवडीसाठी घेतलेल्या पैशांचा तगादा सुरू झाल्याने शेतकऱ्यांना नाईलाजास्तव बेभावाने कापूस विक्री करावा लागत आहे.

तोट्याचा ताळेबंद

शेतकऱ्यांना कपाशी लागवडीचा एकरी खर्च २१ हजार ५०० रुपये अंदाजे आला आहे. सरासरी उत्पादकता एकरी दहा क्‍विंटल व सहा हजार रुपयांचा दर अपेक्षित धरता ६० हजार रुपयांचे उत्पन्न मिळाल्यास एकरी अवघे १९ हजार ६०० रुपयांचे उत्पन्न होईल. या वर्षी उत्पादकता अवघी चार ते पाच क्‍विंटलवर पोचली. परंतु खर्च तेवढाच असल्याने शेतकऱ्यांना उधारी उसनवारी फेडण्यासाठी घरून पैशाची सोय करावी लागत आहे.

शासनाचे निर्णय अयोग्य असून याचे परिणाम सर्वत्र दिसत आहेत. त्याचा फटका सर्वांनाच बसला आहे. कापूस खरेदीचा उत्साह मावळला आहे. भाव कोसळल्याने शेतकऱ्यांची मानसिक स्थिती बिघडल्याचे चित्र आहे. जास्त भावात खरेदी केलेला कापूस कमी भावात विकता येत नसल्याने व्यापारी त्रस्त आहेत.

-दिगंबर तायडे, कापूस व्यापारी