बारावे ज्योतिर्लिंग घृष्णेश्वर मंदिरात यंदा भाविकांविना महाशिवरात्री साजरी, यात्रा रद्द झाल्याने सर्वत्र शुकशुकाट

खुलताबाद (जि.औरंगाबाद) : वेरुळ (ता.खुलताबाद) येथील १२ वे ज्योतिर्लिंग कोरोना स्थितीमुळं बंदच असल्याने गुरुवारी (ता.११) भाविकाविनाच महाशिवरात्री साजरी झाली. महाशिवरात्रीच्या पर्वकाळात वेरुळ येथे भरणारी यात्राच रद्द झाल्याने वेरुळमध्ये शुकशुकाटच होता. वेरुळ येथील १२ वे ज्योतिर्लिंग हे यात्रा पुरण करणारे ज्योतिर्लिंग असुन महाशिवरात्रीच्या पर्वकाळात भाविक लाखोच्या संख्येने वेरुळमध्ये येतात. यंदा मात्र महाराष्ट्रात पुन्हा कोरोना रुग्णसंख्या वाढत असल्याने प्रशासन पातळीवर १० ते १३ असे चार दिवस मंदिरच बंद ठेवण्यात आले असून यात्राही रद्द करण्यात आली आहे. या ठिकाणी भाविकांनी येऊ नये म्हणुन कटक पोलिस बंदोबस्त ठेवला आहे.

वेरुळ येथील १२ वे ज्योतिर्लिंग श्री.घृष्णेश्वर मंदिरात महाशिवरात्रीनिमित्त गुरुवारी (ता.११) पहाटे पाचच्या दरम्यान मुख्य पुजारी रविंद्र पुराणिक यांच्या प्रमुख उपस्थितीत पूजा करण्यात आली. यावेळी घृष्णेश्वराचे लिंग आकर्षक फुलांनी सजविण्यात आले होते. यंदा गर्भगृहात ना गर्दी होती ना हर हर महादेवचा गजर सालाबादाप्रमाणे घृष्णेश्वर मंदिर ते शिवालय तीर्थ निघणारी पालखी मिरवणुक यंदा मंदिरा बाहेरील परिसरातच काढण्यात आली असल्याचे मंदिर विश्वस्त समिती अध्यक्ष शशांक टोपरे यांनी कळविले.

तसेच रात्री १२ वाजता शासकीय महापूजा होणार असल्याचं कळविले. मंदिर परिसरात भाविकांनी गर्दी करु नये. म्हणुन चोख पोलिस बंदोबस्ता बरोबरच मंदिर विश्वस्त समितीचे योगेश विटखेडे, चंद्रशेखर शेवाळे, सुनिल जोशी, रेखा सुरेश ठाकरे, संजय जोशी हे लक्ष ठेवून होते. वेरुळ येथे महाशिवरात्रीनिमित्त सालाबादाप्रमाणे याञा भरते. त्यामुळे रस्त्याच्या दुतर्फा विविध दुकाने, उपहारगृह, फिरती सिनेमागृह यामुळे वेरुळ नगरीत साधारण तीन दिवस उत्साही अन् उत्सवी वातावरण असते. यंदा मात्र आहे ती नीरव शांतता. या यात्रेनिमित्त राज्य परिवहन महामंडाळासह विविध दुकाने, उपहारगृहे, सिनेमागृह यांच्या माध्यमातुन होणारी लाखोची उलाढाल ठप्प झाली. त्याच वेळी ग्रामपंचायतीला मिळणारे उत्पन्नही बुडाले.

संपादन - गणेश पिटेकर