पंचायत समिती उपसभापती शेळके मारहाण प्रकरणी सहा जणांना अटक

औरंगाबाद : औरंगाबाद पंचायत समितीचे (Aurangabad Panchayat Samiti) उपसभापती अर्जुन शेळके यांना मारहाण केल्याच्या प्रकरणात पंचायत समितीचे काँग्रेस (Congress) सदस्य अनुराग शिंदे, विजय जाधव, शिवसेना पदाधिकारी मंगेश जाधव यांच्यासह एकूण सहा जणांना गुरुवारी (ता. पाच) सिटी चौक पोलिसांनी अटक केली. पंचायत समितीचे नवनियुक्त उपसभापती अर्जुन शेळके (Crime In Aurangabad) यांनी दिलेल्या तक्रारीनूसार, शेळके हे ता.२ ऑगस्ट रोजी दुपारी दालनात काम करत होते. त्यावेळी काँग्रेस सदस्य अनुराग शिंदे, विजय जाधव हे साथीदारांसह दालनात आले. शिंदे यांनी माझ्याविरुद्ध उपसभापतीपदाच्या निवडणुकीत का उभा राहिला, असे म्हणत शिवीगाळ व मारहाण केली.

तसेच जाधव व इतर त्यांच्या साथीदारांनीही दालनातील शासकीय खुर्च्या अंगावर व डोक्यात फेकून मारल्या. तसेच ठार मारण्याची धमकी दिल्याचे उपसभापती शेळके यांनी तक्रारीत नमूद केले. दरम्यान, या मारहाण प्रकरणी पोलिसांनी अनुराग शिंदे, विजय जाधव, मंगेश जाधव, गौतम उबाळे, उल्हास देशमुख, जाफर बहाद्दूर खान पठाण या सहा जणांना अटक केली. त्यांना न्यायालयाने न्यायालयीन कोठडी सुनावल्याची माहिती पोलिस निरीक्षक संभाजी पवार यांनी दिली.