Sambhaji Nagar News : थंडीत विद्यार्थी कुडकुडले

छत्रपती संभाजीनगर : डॉ. बाबासाहेब आंबेडकर मराठवाडा विद्यापीठाच्या वसतिगृहातील सोलर वॉटर हिटर दुरुस्तीअभावी वर्षभरापासून चक्क काढून ठेवले आहे. त्यामुळे विद्यार्थ्यांना ऐन कडाक्याच्या थंडीत कुडकुडत गार पाण्याने अंघोळ करावी लागत आहे. त्यामुळे आधीच बदलत्या वातावरणामुळे आजारपण वाढत असतानाच सोलरविना दिवस काढावे लागत असल्याने आरोग्यासह अभ्यासावर परिणाम होत असल्याच्या भावना विद्यार्थ्यांनी ‘सकाळ’शी बोलताना व्यक्त केल्या.

दरम्यान, मंगळवारी (ता.१३) अधिसभा सदस्य हरिदास सोमवंशी यांनी तत्काळ वसतिगृहाला भेट सोलरची पाहणी केली. यासंदर्भात सदस्य सोमवंशी यांच्यासह राष्ट्रवादी विद्यार्थी काँग्रेसचे सादिक शेख यांनी कुलगुरू, विद्यार्थी कल्याण विभाग आणि मालमत्ता विभागाला सोलर हिटर बसविण्यासंदर्भात निवेदन दिले. त्यानुसार विद्यापीठातील मुलामुलींच्या वसतीगृहात निकामी झालेल्या, दुरुस्तीसाठी काढून ठेवलेल्या सोलर हिटरची तातडीने दुरुस्ती करण्याची मागणी केली आहे.

विद्यापीठातील सहा वसतिगृहात जवळपास दोन हजारांवर विद्यार्थी राहतात या सर्वच विद्यार्थ्यांच्या आरोग्याचा प्रश्न निर्माण झाला असून तत्काळ सोलर वॉटर हिटरची दुरुस्ती करण्याची मागणी सादिक शेख, अंकुश सोनवणे, गणेश शिंदे यांनी केली आहे.

वसतिगृहावर बसविलेले सोलर हिटर दुरुस्तीच्या नावाखाली काढून ठेवण्यात आले. यासंदर्भात कुलगुरुंना निवेदन देताच त्यांनी येत्या पाच दिवसात सोलर दुरुस्त करण्याचे आश्वासन दिले आहे.

— हरिदास सोमवंशी, अधिसभा सदस्य.

थंडीचे दिवस आहेत. त्यामुळे सकाळी सकाळी व्यायाम आणि अभ्यासासाठी उठतो. सहा वाजता वाजता रिडींग रुमला जावे लागते, तेव्हा खूपच थंडी असते. गरम पाण्याची सोय नसल्यामुळे अनेकवेळा आजारी पडायला होते.

— अंकुश सोनवणे, विद्यार्थी.

मगील दोन वर्षांपासून विद्यापीठ प्रशासन विद्यार्थ्यांच्या जीवाशी खेळत आहे, हे असे चालू राहिले तर आम्ही आंदोलन करणार आहोत.

— सादिक शेख, प्रदेश सरचिटणीस, राष्ट्रवादी विद्यार्थी काँग्रेस.