Sambhajinagar Crime : झोपलेल्या मुलाला वडिलांचा चुकून धक्का लागला; मुलानं थेट लोखंडी कड्यानं बापाचं डोकंच फोडलं

छत्रपती संभाजीनगर : देवपूजा झाल्यानंतर देवपूजेचे पाणी घराबाहेर घेऊन जाताना झोपलेल्या मुलाला वडिलांचा चुकून धक्का लागला. या कारणावरून मुलाने हातातील लोखंडी कड्याने चक्क वडिलांचे डोके फोडले. घरातील साहित्याची तोडफोड करत नासधूस केली.

मारहाणीत वडील गंभीर जखमी झाले आहेत. ही घटना ८ नोव्हेंबर रोजी सिडको एन-७ परिसरातील त्रिवेणीनगरात घडली. या प्रकरणी पित्याने दिलेल्या फिर्यादीवरून मुलाविरोधात सिडको पोलिस ठाण्यात (CIDCO Police Station) गुन्हा दाखल झाला आहे. अमोल राजेंद्र ऊर्फ राजेश पाराशर (रा. त्रिवेणीनगर) असे मुलाचे नाव आहे.

या प्रकरणी जखमी राजेंद्र बाबुराव पाराशर (६४) यांनी फिर्याद दिली. ते माजी सैनिक असून सध्या घरीच असतात. फिर्यादी राजेंद्र हे ८ नोव्हेंबरच्या सकाळी साडेनऊदरम्यान देवपूजा करत होते. पूजा आटोपल्यानंतर पूजेचे पाणी बाहेर टाकण्यासाठी ते घराबाहेर जात होते. त्यावेळी घरातील हॉलमध्ये त्यांचा मुलगा झोपला होता.

राजेंद्र यांचा मुलाला चुकून धक्का लागला. त्याचा राग आल्याने मुलाने वडिलांना बेदम मारहाण केली. हातातील लोखंडी कडे वडिलांच्या मारल्याने त्यांच्या डोक्यातून रक्ताची धार वाहू लागली. रक्तबंबाळ झालेल्या वडिलांनी मुलाच्या विरोधात तक्रार दिली. अधिक तपास हवालदार भालेराव करत आहेत.