Chh. Sambhaji Nagar Crime : सासरच्या लोकांनी मारहाण केल्याने जावयाचा मृत्यू

वाळूजमहानगर : अंबेलोहोळ येथे पती-पत्नीत झालेल्या भांडणाची माहिती माहेरी सांगितल्याने जावयाच्या सासरकडील मंडळींनी ३१ वर्षीय जावयाला रविवारी (ता.९) ठार मारण्याची धमकी देत मारहाण केल्याने गंभीर जखमी झालेल्या जावयाचा उपचारादरम्यान गुरुवारी (ता.१३) मृत्यू झाला.

अंबेलोहोळ येथे रविवारी (ता.९) सकाळी ११ वाजेच्या सुमारास गीता अनिल पिंपळे व अनिल शालिन पिंपळे या पतीपत्नीत घरगुती वाद झाला होता. या वादाची माहिती गीताने तिच्या आईवडिलांना दिली.

त्यामुळे अनिलचे सासरे संजय लक्ष्मण चव्हाण, सासू पारुबाई संजय चव्हाण, मेहुणा कृष्णा संजय चव्हाण व साडू करण भीमा पवार यांनी अंबेलोहळ येथे येऊन आमच्या मुलीला त्रास का देतो, असे म्हणून ठार मारण्याची धमकी देत मारहाण केली.

यात अनिल गंभीर जखमी झाला. त्यामुळे त्याने जोरजोरात आरडाओरड केल्याने गावातील अफसर अकबर पटेल, सारंग काळे व अशोक उगले यांनी अनिलला त्यांच्यापासून सोडवून उपचारासाठी घाटी दवाखाना येथे दाखल केले.

उपचार सुरू असताना गुरुवारी (ता.१३) अनिल पिंपळेचा मृत्यू झाला. या प्रकरणी वाळूज एमआयडीसी पोलिस ठाण्यात आरोपी सासरे संजय चव्हाण, सासू पारुबाई चव्हाण, मेहुणा कृष्णा चव्हाण तसेच साडू करण पवार यांच्याविरोधात गुन्हा दाखल करण्यात आला. तपास पोलिस निरीक्षक अविनाश आघाव यांच्या मार्गदर्शनाखाली एस डी आधाने करत आहे.

कृष्णा पवारनेही दिली तक्रार

दरम्यान कृष्णा संजय पवार यांनीही वाळूज एमआयडीसी पोलिस ठाण्यात तक्रार दिली की, बहीण गीता अनिल पिंपळे हिने तिचा पती अनिल पिंपळे हे तिला वारंवार त्रास देत आहे, असे कळविल्याने मी व माझे आई वडील आम्ही गीता हिच्या घरी अंबेलोहळ येथे संध्याकाळी ६ वाजेच्या सुमारास बहिणीचे पती अनिल यांना समजावण्यास त्यांचे घरी गेलो.

तेथे आमच्या मध्ये बाचाबाची होऊन वाद झाला. तेव्हा मी व माझे आईवडील आम्ही आमचे घरी एकलेहरा येथे परत आलो. त्यानंतर रात्री सुनील शालीन पिंपळे, गणेश शालीन पिंपळे, पप्पू पूनमचंद काळे व निकिता गणेश पिंपळे असे आमच्या घरी आले व आम्हाला सुनील शालीन पिंपळे याने माझे भावासोबत वाद का केला असे म्हणून लाकडी दांड्याने मारुन जखमी केले.