Parbhani News : हिवाळ्यातच प्रकल्प गाढू लागले तळ

परभणी : जिल्ह्यात पाणी टंचाईचे संकट आता गडद होताना दिसत आहे. जिल्ह्यातील महत्वाच्या प्रकल्पातील पाणीसाठी दिवसेदिवस कमी होत आहे. झपाट्याने पाणीसाठ्यात होणारी घट जिल्हा वासियांसाठी चिंतेची बाब ठरत आहे. पाणी साठ्यात होणारी घट अशीच कायम राहीली तर, आगामी काळात भीषण पाणीटंचाईचा सामना करावा लागण्याची भिती व्यक्त होत आहे.

जिल्ह्यात जिंतूर तालुक्यातील येलदरी व सेलू तालुक्यातील निम्न दुधना हे दोन मोठे प्रकल्प आहेत. दोन मध्यम व २२ लघू प्रकल्प आहेत. या प्रकल्पातील पाणीसाठ्यावरच संपूर्ण उन्हाळ्याची भिस्त असते. मात्र सध्याच्या स्थितीला पूर्णा नदीवरील येलदरी प्रकल्प व सेलू तालुक्यातील दुधना नदीवरील निम्न दुधना प्रकल्पातील पाणीसाठा चिंतेचा विषय बनला आहे.

येलदरी प्रकल्पात आज घडीला केवळ ५९. १२ टक्के इतकाच पाणीसाठा शिल्लक आहे. या प्रकल्पावर मुख्य म्हणजे परभणी शहराचा पाणीपुरवठा अवलंबून आहे. दुसरीकडे निम्न दुधना प्रकल्पातील पाणीसाठा तर २१ टक्क्यापर्यंत खाली आला आहे. या दोन्ही मोठ्या प्रकल्पातील पाणीसाठा सातत्याने कमी होत चालला आहे. त्यामुळे जिल्ह्यात चिंतेचे वातावरण पसरले आहे. यंदा जिल्ह्यात जून महिन्यापासून आजपर्यंत केवळ सरासरीच्या ५२३ मिलीमिटर पाऊस झाला आहे. त्यामुळे त्याची टक्केवारी केवळ ६६ टक्के इतकीच येते. अश्या विपरित परिस्थितीत सध्या परभणीकर आले आहेत.

यापूर्वीच जिल्हा प्रशासनाने अलनिनोचा जिल्ह्यातील पाणी पातळीवर परिणाम होणार असल्याचे संकेत दिले होते. त्यानुसार जिल्हातील पाणीसाठा जपून वापरण्याच्या सुचना देखील तत्कालीन जिल्हाधिकारी आंचल गोयल यांनी दिल्या होत्या. त्यानुसार आरखडा तयार करण्यात आला होता. त्या आराखड्याची अमलबजावणी करण्याची वेळ सध्या जिल्ह्यावर आली आहे.

७५ टक्क्यापेक्षाही कमी पाऊस

जून ते सप्टेंबर २०२३ या कालावधीत सरासरी पर्जन्यमान ७५ टक्क्यापेक्षा कमी व एकूण पावसाच्या ७५० मिलीमिटर पेक्षा कमी झाली आहे. अशा जिल्ह्यातील ५२ महसूल मंडळापैकी ३९ मंडळात राज्य शासनाकडून १० नोव्हेंबर रोजी दुष्काळ सदृश्य परिस्थिती घोषित केली आहे. यावर्षीच्या खरीप हंगामात ५ लाख ३४ हजार ८९९ हेक्टर क्षेत्रापैकी ५ लाख २० हजार हेक्टरवर शेतकऱ्यांकडून तूट स्वरुपात झालेल्या पावसावर पेरणी केली आहे. संपूर्ण पावसाळा ७८३ मिलीमिटर पाऊस होणे अपेक्षित असताना केवळ ५२३ मिलीमिटर पाऊस झाला आहे.