Sambhaji Nagar News : कुणबी-मराठा नोंदीसाठी तहसीलनिहाय शोधमोहीम सुरू

छत्रपती संभाजीनगर : मराठवाड्यातील छत्रपती संभाजीनगर, लातूर आणि नांदेड या तीन जिल्ह्यांत कुणबी - मराठा पुरावे लोकसंख्येच्या मानाने कमी प्रमाणात आढळले. त्यामुळेच हिंगोलीच्या पथकाने छत्रपती संभाजीनगरातील पुरावे शोधण्याचे काम प्रत्येक तहसीलनिहाय सुरू केले आहे. या पथकाने तहसीलदार, नायब तहसीलदारांची बैठक घेत सूचना दिल्या. याशिवाय पथकाची दोन टप्प्यांत विभागणी करण्यात आली.

छत्रपती संभाजीनगर, लातूर आणि नांदेड या तीन जिल्ह्यांत पुरावे कमी प्रमाणात आढळून आल्याने न्या. संदीप शिंदे यांच्या समितीने नाराजी व्यक्त केली. कुणबी-मराठा, मराठा-कुणबी नोंदी असलेल्या दस्तांची फेरतपासणी करावी, असे आदेश न्या. शिंदे समितीने दिल्यानंतर आता हिंगोलीहून आलेल्या पथकाने तालुकानिहाय अभिलेख कक्षातील आढावा घेण्यास सुरवात केली आहे.

आणखी पुरावे शोधण्यासाठी तालुकानिहाय पुरावे उघडून पाहिले जात आहेत. सप्टेंबर, ऑक्टोबर आणि नोव्हेंबर या तीन महिन्यांत जिल्हा प्रशासनाने १९ लाख ३८ हजार ११५ पुरावे तपासले होते. त्यात १ हजार २७८ कुणबी-मराठा अशा नोंदी आढळून आल्या आहेत. लोकसंख्येच्या प्रमाणात कमी पुरावे आढळल्याने हिंगोलीतील अपर जिल्हाधिकारी प्रवीणकुमार धरमकर, उपजिल्हाधिकारी मंजूषा मुथा, अपर तहसीलदार एस. डी. सुरे यांचे पथक पुरावे शोधण्यासाठी शहरात दाखल झाले आहे. ८ डिसेंबरपर्यंत हे पथक पुन्हा पुराव्यांची शोधाशोध करणार आहे.

अशी होतेय शोधाशोध

शोधमोहिमेत खासरापत्रक, पाहणीपत्रक, कूळ नोंदवही, १९५१ चे राष्ट्रीय रजिस्टर, हक्क नोंदपत्र, फेरफार पत्र, सातबारा, गाव नमुना, प्रवेश निर्गम नोंदवही, अनुज्ञप्ती नोंदवही, मळी नोंदवही, ताडी नोंदवही, आस्थापना नोंद, कारागृहातील नोंदी, गाववारी, गोपनीय रजिस्टर, क्राइम रजिस्टर, अटक पंचनामे, एफआयआर, मुद्रांक विभागातील १३ प्रकारचे दस्तऐवज, भूमी अभिलेखामधील सात दस्तऐवज, मुंतखब आदी अभिलेखातील नोंदी घेण्याचे राहून गेले की काय याचा आढावा पथक घेत आहे.