Sambhaji Nagar News : उभ्या कंटेनरला कारची धडक ; चालक तरुणाचा जागीच मृत्यू

मुकुंदवाडी : कारचालकाचे नियंत्रण सुटल्याने कार उभ्या कंटेनरला धडकली. यात धार्मिक शेखर राणे (२३, रा. एन-३ सिडको) हा तरुण जागीच ठार झाला. शुक्रवारी पहाटे साडेतीन वाजता मुकुंदवाडी भागातील जिमखाना समोर हा अपघात घडला. या प्रकरणी मृत कारचालक तरुणाविरुद्ध स्वतःच्या मृत्यूस कारणीभूत ठरल्याप्रकरणी गुन्ह्याची नोंद झाली आहे.

जालना ते माळीवाडीकडे कंटेनर क्रमांक (एमएच-२ बीएच-२२१६) जात होता. रात्री ३ च्या सुमारास कंटेनर चालकाला झोप येत असल्यामुळे त्याने बस स्टॉप मुकुंदवाडी पोलिस स्टेशनजवळ रोडच्या बाजूला कंटेनर उभा केला. त्यावेळी स्कोडा कारचा (क्र. एमएच-ईई-५१०१) चालक राणे भरधाव चिकलठाण्याकडून येताना उभ्या कंटनेरला धडकला. धडक एवढ्या जोरात होती, की कारचे बोनेट कंटेनरच्या खाली घुसले. यामध्ये धार्मिक जागीच ठार झाला. पोलिसांनी तत्काळ घटनास्थळी धाव घेतली. या प्रकरणी मुकुंदवाडी पोलिस ठाण्यात गुन्हा नोंद झाला.

भरधाव वेग ठरला कारणीभूत

धार्मकि हा रॅपीड स्कॉर्पिओमध्ये चिकलठाण्याहून रात्री ३.३० च्या सुमारास येत होता. त्याच्यापुढे पोलिसांची गाडी ही प्रति ताशी ३० च्या स्पीडने येत होती. त्याचवेळी स्कोडा कारचालक हा १६० च्या स्पीडने आला व पुढे गेला. त्यानंतर लागलीच तो उभ्या कंटेनरला धडकला, अशी माहिती मुकुंदवाडीचे पोलिस निरीक्षक शिवाजी तावरे यांनी दिली.