Pachod Police : मारुती मंदिरात पूजेचा बहाणा केला अन् पुजारी महिलेच्या गळ्यातील सोन्यावरच चोरट्यांनी डल्ला मारला

आडुळ : भरदिवसा मंदिरात पुजारी असलेल्या महिलेला आम्हाला देव पूजा करायची आहे. मात्र, आमच्याकडे सोनं नाही, त्यामुळे पूजा करेपर्यंत तुमच्या गळ्यातील सोन्याची पोत (Gold Necklace) द्या. पूजा संपली की, सोनं व अकराशे रुपये दक्षिणा तुम्हाला देतो असं सांगून चोरट्यांनी पूजा संपल्यानंतर सदरील महिलेची दिड तोळे सोन्याच्या पोतवर डल्ला मारीत दुचाकीवरुन पोबारा केल्याची घटना आडुळ (ता. पैठण) येथे घडली.

याबाबत पाचोड पोलिसांनी (Pachod Police) दिलेल्या माहितीनुसार, आडुळ (ता. पैठण) येथील मारुती मंदिर संस्थान (Maruti Temple Sansthan) येथे रुख्मनबाई बबनराव परेश व त्यांचे कुटुंबीय पुजारी म्हणून कार्यरत आहेत. आज रुख्मनबाई परेश या एकट्याच मंदिरात होत्या, त्यावेळी दुपारी एक वाजेच्या सुमारास दोन अज्ञात व्यक्ती तिथे आले व त्यांना म्हणाले, आम्हाला मारुतीची पूजा करायची असून आम्ही फूल व दक्षिणा आणली आहे. मात्र, आमच्याकडे सोनं नाही तेव्हा तुम्ही आमची पूजा करेपर्यंत तुमच्या गळ्यातील सोन्याची पोत या अकराशे रुपये (दक्षिणा) व फुलावर ठेवा.

म्हणजे, आमची पूजा पुर्ण होईल. त्यानंतर तुमची पोत व दक्षिणा तुम्ही घेवून टाका असे सांगितल्याने रुख्मनबाई यांनी त्यांच्या गळ्यातील पोत पूजेच्या फुलावर ठेवली. याच संधीचा फायदा घेत या अज्ञात दोन्ही भामट्यांनी तिथे पूजेसाठी ठेवलेली पोत घेऊन मंदिरातून धूम ठोकली. ही बाब रुख्मनबाई यांच्या लक्षात येताच त्यांनी आरडाओरड केला.

मात्र, तो पर्यंत चोरट्यांनी दुचाकीवर बसून पोबारा केला. रस्त्यावरील दोन-तीन ठिकाणी असलेल्या सीसीटिव्ही कॅमेऱ्यात सदरील चोरटे कैद झाले असून या आधारे पाचोड पोलीस चोरट्यांचा शोध घेत आहेत. या घटनेची नोंद पाचोड पोलीस ठाण्यात घेण्यात आली असून सहाय्यक पोलीस निरीक्षक शरदचंद्र रोडगे यांच्या मार्गदर्शनाखाली पोलीस उपनिरीक्षक ज्ञानेश्वर राडकर, बीट जमादार जगन्नाथ उबाडे करीत आहेत.

दरम्यान, संध्याकाळी पैठण तालुक्याचे उपविभागीय पोलीस अधिकारी सिध्देश्वर भोरे, पाचोड पोलीस ठाण्याचे सहायक पोलीस निरीक्षक शरदचंद्र रोडगे, बीट जमादार जगन्नाथ उबाळे यांनी घटनास्थळाला भेट देऊन पाहणी केली व भोरे यांनी तपासासंदर्भात सूचना केल्या.