Toyota Kirloskar : टोयोटा किर्लोस्करला ८२७ एकर जागा; हायब्रिड, इलेक्ट्रिक कार निर्मिती प्रकल्‍प

छत्रपती संभाजीनगर : छत्रपती संभाजीनगरच्या औद्योगिक जगताचा चेहरामोहरा बदलण्याची क्षमता असलेल्या टोयोटा किर्लोस्कर प्रकल्पासाठी सोमवारी (ता. सात) ऑरिक सिटीमध्ये एकूण ८२७ एकर जागा देण्यात आली. २१ हजार कोटी रुपयांच्या गुंतवणुकीतून उभारल्या जाणाऱ्या या प्रकल्पात कंपनी हायब्रिड आणि इलेक्ट्रिक कारची निर्मिती करणार आहे.

टोयोटा किर्लोस्कर प्रकल्पाच्या सामंजस्य करारावर नुकत्याच स्वाक्षऱ्या करण्यात आल्या होत्या. त्यानंतर या ग्रीनफिल्ड प्रकल्पाच्या पुढील हालचालींवर सर्वांचे लक्ष होते. या कंपनीला ऑरिक सिटीमध्ये एकूण ८२७ एकर जागा प्राप्त झाली.

सोमवारी ही प्रक्रिया पूर्ण झाली. डीएमआयसीच्या सूत्रांनी सांगितले, की शेंद्रा आणि बिडकीन हे औद्योगिक विभाग विकसित करण्यासाठी राज्य सरकारने महाराष्ट्र औद्योगिक नागरे मर्यादित अर्थात एमआयटीएल स्थापन केली आहे. तिच्यामार्फत ही प्रक्रिया केली जात आहे. ऑरिक सिटीच्या बिडकीन विभागात टोयोटा किर्लोस्करचा प्रकल्प उभारला जाणार आहे.

आणखी तीन प्रकल्पांना ऑफर

एकीकडे टोयोटा किर्लोस्कर कंपनीला बिडकीन ऑरिक सिटीत ८२७ एकर जागा दिली गेली, तर दुसरीकडे आणखी तीन प्रकल्पांना जागा देऊ करणारे ऑफर लेटर ‘एमआयटीएल’च्या वतीने सोमवारी देण्यात आले. त्यात एंड्युरन्सच्या ग्रीनफिल्ड प्रकल्पासाठी ३० एकर, तर व्हेरॉकच्या प्रकल्पासाठी १८ एकर जागा देऊ करण्यात अली आहे. ती बिडकीनमध्ये असेल. याशिवाय सिमेन्स कंपनीला शेंद्रा येथे सहा एकर जागा देऊ करण्याचे ऑफर लेटर देण्यात आले.

ऑटोमोबाइल क्षेत्राला चालना

छत्रपती संभाजीनगर हे ऑटोमोबाइल हब म्हणून ओळखले जाते. बजाज, स्कोडा या जुन्या प्रकल्पांनंतर येथे एथेरचा इलेक्ट्रिक दुचाकींचा प्रकल्प आला. आता टोयोटा किर्लोस्कर येत आहे. यामुळे आता ऑटोमोबाइल क्षेत्राशी संबंधित पूरक उद्योगांच्याहीं संधी वाढणार आहेत.

२०२६ मध्ये प्रत्यक्ष उत्पादन

या प्रकल्पासाठी कंपनी २१ हजार कोटी रुपये गुंतवत आहे. प्रकल्पाद्वारे दरवर्षी किमान ४ लाख हायब्रिड आणि इलेक्ट्रिक वाहने तयार करण्याची क्षमता राहणार आहे. जानेवारी २०२६ मध्ये या प्रकल्पातून प्रत्यक्ष उत्पादन सुरू होईल. या मोठ्या प्रकल्पामुळे ८ हजार प्रत्यक्ष आणि १८ हजार अप्रत्यक्ष, अशा एकूण २६ हजार रोजगारांची निर्मिती होणार आहे.