Waluj MIDC Fire : छ. संभाजीनगरात मध्यरात्री हँडग्लोज बनवणाऱ्या कंपनीला भीषण आग; 6 कामगारांचा होरपळून मृत्यू

Waluj MIDC Fire News : छत्रपती संभाजीनगरच्या वाळूज औद्योगिक वसाहतीत (Waluj Industrial Estate) मध्यरात्री भीषण दुर्घटना घडलीये. येथील हँडग्लोज (Handgloves) बनवणाऱ्या सनशाईन एंटरप्राईज कंपनीत (Sunshine Enterprise Company) भीषण आग लागली असून यात कंपनीतील 6 कामगारांचा झोपेत असतानाच होरपळून मृत्यू झाला आहे.

तर, कंपनीतील चार कामगारांनी बाहेर पडून आपला कसाबसा जीव वाचवला आहे. ही आग कशामुळे लागली हे अद्याप समजू शकले नाही. वाळूज औद्योगिक परिसरात हँडग्लोज बनवणारी सनशाईन एंटरप्राईज कंपनी आहे. या कंपनीला मध्यरात्री अचानक आग लागली.

या दुर्घटनेत 6 कामगारांचा जळून मृत्यू झाला, तर 4 कामगारांनी स्वतःचा जीव वाचवला आहे. सनशाईन एंटरप्राईज सी 216 हँडग्लोज तयार करते. या कंपनीत 20 ते 25 कामगार काम करतात.

दरम्यान, हे सर्व कामगार बिहारमधील असल्याचं कळतंय. ते कामानिमित्त येथे आले होते. या कंपनीत हँडग्लोज आणि जॅकेट बनवलं जात होतं. मात्र, कंपनीतील या घटनेमुळं एकच खळबळ उडाली आहे.