Beed Railway: रेल्वेने चिरडल्याने २२ मेंढ्या, दोन गुरे व एका मेंढपाळाचा मृत्यू

Parali vaijyanath: शहरापासून पासून अगदी जवळच असलेल्या मलकापूर शिवारात मोठी भीषण दुर्घटना घडली असुन २२ मेंढ्या, दोन गुरे व एका मेंढपाळाचा या दुर्घटनेत रेल्वेखाली आल्याने मृत्यू झाल्याची घटना सकाळी १० वाजता घडली आहे. या घटनेने परळी व परिसरात एकच खळबळ उडाली आहे.

शहरातील धनगर गल्ली येथील मधुकर सरवदे व मुंजा मुक्तीराम डोणे (रा.उखळी, ह. मु. परळी) हे दोघे रेल्वे पटरीने मेंढ्या चारण्यासाठी जात होते. रविवारी (ता.११) सकाळी १० वाजता आपल्या मेंढ्या चारण्यासाठी रेल्वे पटरीच्या कडेने जात असताना मलकापुर शिवारात समोरुन आलेल्या मालगाडीने मेंढ्या, दोन जनावरांना चिरडले.

दोन्ही बाजुने डोंगर असल्याने बचावासाठी वेळच मिळाला नसल्याने मेंढपाळ मुंजा डोणे हे देखील या दुर्घटनेत सापडून ठार झाले. या दुर्घटनेत श्री सरवदे यांच्या २२ मेंढ्या व दोन जनावरे मृत्युमुखी पडले आहेत. मुंजा मुक्तीराम डोणे यांचा मृतदेह उत्तरीय तपासणीसाठी येथील उपजिल्हा रुग्णालयात दाखल करण्यात आला होता.