Bhokardan News : भोकरदनचा आलोक अमेरिका वासियांसाठी ठरला देवदूत; हेलीना चक्रीवादळानंतर आठवडाभर केली मदत

भोकरदन - 'वसुधैव कुटुंबकम"या प्राचीन भारतीय संस्कृतीतील वाक्यप्रचाराप्रमाणे संपूर्ण जग हेच आपले कुटुंब आहे, असे मानून मानवतावादी दृष्टिकोनातून सर्वांची काळजी घेणारा देवदूत अशी वेगळी ओळख जालना जिल्ह्यातील भोकरदनच्या आलोककुमारने अवघ्या काही दिवसातच सातासमुद्रापार असणाऱ्या अमेरिकेत केली आहे.

पेट्रोल पंपावर नोकरी ते हॉटेल मालक

मूळचा जालना जिल्ह्यातील भोकरदन येथील रहिवासी असलेला आलोक कुमार आक्से या युवकाने अमेरिकेतील दक्षिण कॅरोलिना प्रांतातील ऐकेन शहरात अस्सल भारतीय खाद्यपदार्थ मिळणारे 'ताज एकेन'नावाने हॉटेल सुरू केले आहे. अमेरिकन लोकांनी भारतीय खाद्य संस्कृतीला आपलेसे केले व अल्पावधीतच हे रेस्टॉरंट लोकप्रिय झाले.

हेलीना चक्रीवादळ अन आलोकची मदत

25 सप्टेंबरच्या दरम्यान अमेरिकेत दक्षिण कॅरोलिना प्रांतात हेलीना चक्रीवादळाने धुमाकूळ घातला यामुळे जवळपास चार दिवस परिसरातील वीज, इंटरनेट, पाणी व इतर सार्वजनिक सेवा पूर्णपणे विस्कळीत झाल्या. या परिसरातील हॉटेल चालकांनी त्यांच्या जेवणाचे दर दुप्पट केले तर आलोक ने मात्र या खडतर परिस्थितीत पहिल्या दिवसापासून गरजू नागरिकांसाठी आठवडाभर मोफत लंच बॉक्सेस वाटप सुरू केले.

विशेष म्हणजे नागरिकांसोबत अग्निशमन दलाचे कर्मचारी ,पोलीस ,सफाई कर्मचारी सर्व सरकारी कर्मचाऱ्यांना दररोज टिफिन बॉक्स दिले जात होते. आलोकने हॉटेलच्या अधिकृत संकेतस्थळ व समाज माध्यमांवर मोफत लंच बॉक्सेस ची घोषणाच करून टाकली. आत्तापर्यंत आलोक ने 2000 पेक्षा जास्त मोफत टिफिन बॉक्सेस चे वाटप केले आहे.

काँग्रेसमन ज्यो विल्सन आले भेटीला

आलोक कुमारच्या या मदतीची दखल तेथील नागरिकांनी तर घेतलीच समाज माध्यमांवर आलोक व त्याच्या हॉटेलविषयी मोठ्या प्रमाणावर अभिनंदन व कौतुकांचे वर्ष होऊ लागले व अमेरिकेतील काँग्रेसमन ज्यो विल्सन यांनी रविवारी ता. ६ आलोक च्या हॉटेलला भेट देऊन स्वतः उभे राहून नागरिकांना टिफिन बॉक्स वाटप केले व आलोकचे कौतुक केले यावेळी एकेन काऊंटी चे अध्यक्ष अँड्र्यू लि साईडर्स देखील उपस्थित होते.

गरजू व्यक्तींना आर्थिक मदत करणे, शिवजयंती व नाताळनिमित्त परिसरातील नागरिकांना मोफत जेवण, सामाजिक संस्थांना नियमित देणगी देण्याचे काम आलोक करीत असतात.

कोण आहेत ज्यो विल्सन

हे अमेरिकेतील काँग्रेसमन असून अनेक वर्ष त्यांनी दूतावासात काम केले आहे.ट्रम्प सरकार यांच्या कार्यकाळात झालेला 'हाऊ डी मोदी' या कार्यक्रमात ते पंतप्रधान नरेंद्र मोदी यांच्यासोबत होते, 2018 च्या स्वातंत्र्य दिनाच्या कार्यक्रमाला भारतात त्यांना प्रमुख पाहुणे म्हणून आमंत्रित करण्यात आले होते.

हॉटेलचे नाव ताजमहल चे छायाचित्र आलोकला भेट

आलोकच्या हॉटेलचे नाव ताज ऐकेन असून जो विल्सन यांनी 1945 सालचे त्यांच्या वडिलांनी त्याकाळी भारतात असताना काढलेले ताजमहालचे सांभाळून ठेवलेले छायाचित्र यावेळी आलोकला भेट दिले.