उस्मानाबाद : जिल्हा परिषदेत पदाधिकाऱ्याची वसुली मोहीम?

उस्मानाबाद : ‘आमची टर्म संपत आली आहे’, असे म्हणत वसुलीची मोहीम राबविणाऱ्या एका पदाधिकाऱ्याची जिल्हा परिषदेच्या आवारात चांगलीच चर्चा सुरू आहे. संबंधित पदाधिकारी ‘ती’ का ‘तो’? याकडे सर्वांचे लक्ष लागले आहे.

जिल्हा परिषद गटांमध्ये विविध विकास कामे करण्याचा प्रयत्न निवडून आलेले सर्वच सदस्य करतात. सध्याच्या पंचवार्षिक निवडणुकीची टर्म संपत आली आहे. अगदी सहा महिन्यांचा कालावधी राहिला आहे. पुढील वर्षाच्या सुरवातीला निवडणुका होण्याचे संकेत आहेत. त्यामुळे काही सदस्य सध्या स्वतःची ‘थेट वसुली’ मोहीम राबवीत असल्याची चर्चा सध्या जिल्हा परिषदेच्या इमारतीत चांगलीच रंगत आहे. प्रत्येक विभागातील अधिकारी, कर्मचारी यांना टेबलला बोलावणे. त्यांची काही चूक असेल तर त्यांची झाडाझडती घेणे. त्यांच्याकडून स्वःहिताची कामे करून घेतली जातात.

जेव्हा एखादा कर्मचारी, अधिकारी याच्या काहीच चुका दिसून येत नाहीत, अशा वेळी त्या अधिकारी, कर्मचाऱ्याच्या समोर गाऱ्हाणे सुरू होते. ‘आमची टर्म संपत आली आहे. आम्हाला काहीतरी मदत करा’ असे म्हणत थेट वसुलीची मागणी केली जात आहे. त्यामुळे अधिकारी, कर्मचारीही चांगलेच बुचकळ्यात पडत आहेत. दरम्यान, कामांच्या यादीमध्येही या सदस्याकडून हेराफेरी करण्याचे प्रयत्न होत असल्याची चर्चा आहे.

‘आम्हालाच नाही, अन् आम्ही काय द्यावं’

काही विभागातील अधिकारी, कर्मचारी प्रामाणिकपणे काम करतात. त्यांच्याकडेही हे सदस्य मागणी करतात. ‘मग, काय आहे का नाही? आमची टर्म संपत आहे. पुन्हा काय आम्ही येणार आहोत का? आमच्याकडेही बघा’ असे म्हणत अधिकारी, कर्मचारी यांच्यासमोर आपले तुणतुणे वाजवत आहेत. ‘कुठे नादी लागायचे’ म्हणत काहीजण टोकन देतही आहेत.