‘कोरोना’चा परिणाम : बस, रेल्वेची ओसरली गर्दी !

परभणी : राज्यभरात कोरोना विषाणूचा संसर्ग पसरू नये, यासाठी योग्य ती खबरदारी घेतली जात आहे. कोरोना विषाणूचा प्रसार हा गर्दीच्या ठिकाणी जास्त होत असल्याचे त्यापासून बचाव करण्यासाठी अनेकांनी आपले गाव व घर सोडणेच नको, असे ठरवून टाकल्याने याचा विपरित परिणाम रेल्वे, बस व खासगी वाहतुकीवर मोठ्या प्रमाणात झाल्याचे चित्र परभणी जिल्ह्यात दिसत आहे. एरवी भरगच्च असणाऱ्या परभणीच्या रेल्वेस्थानकासह बसस्थानकावरदेखील तुरळक प्रवाशी दिसत आहेत. खासगी ट्रॅव्हल्सच्या प्रवाशी संख्येवरदेखील परिणाम दिसून आला आहे.

कोरोना विषाणूचा प्रसार राज्यात दिसून आला आहे. काही ठिकाणी कोरोना विषाणूचा संसर्ग झालेले रुग्ण आढळल्याने राज्य शासनाने खबरदारीच्या सर्व उपाययोजना सुरू केल्या आहेत. राज्यातील नागरी भागातील सर्व शाळा बंद ठेवण्याचे आदेश शनिवारी (ता. १४) काढण्यात आले आहेत. आरोग्य विभागाच्या वतीने कोरोनाच्या संसर्गापासून टाळण्यासाठी सांगण्यात आलेल्या उपाययोजनांमध्ये गर्दीचा संपर्क टाळावा हे सांगण्यात आल्याने नागरिक गर्दीपासून दूर राहताना दिसत आहेत. याचा परिणाम वाहतुकीवर झाला आहे.

हेही वाचा - पोलिसांचा उन्हाळा होणार सुसहाय्य !

निम्मे प्रवाशी दोन्ही स्थानकांवर
 एरव्ही परभणीचे बसस्थानक व रेल्वेस्थानकावर प्रवाशांची मोठी गर्दी पाहावायास मिळते. दोन्ही स्थानकांवर सकाळी सहापासून ते रात्री ११ पर्यंत प्रवाशांची वर्दळ सुरूच असते. परंतु, तीन ते चार दिवसांपासून या वर्दळीवर परिणाम दिसून आला आहे. नेहमीपेक्षा निम्मे प्रवाशी या दोन्ही स्थानकांवर दिसून आले. अनेक बस किरकोळ प्रवाशी घेऊन धावतांना दिसत होते. रविवारी (ता. १५) सकाळी नांदेडकडे जाणाऱ्या व औरंगाबादकडे जाणाऱ्या रेल्वेतही म्हणावी तशी गर्दी दिसून आली नाही.

हेही वाचा - ‘या’ जिल्ह्यात कर्जमाफीचे ५२१ कोटी हस्तांतरीत

जाणाऱ्यात घट, येणाऱ्यात वाढ
खासगी ट्रव्हल्स कंपन्यांना या विषाणूच्या संसर्गाचा फटका बसला आहे. परभणी शहरातून दररोज ७० ते ८० ट्रॅव्हल्स पुणे, मुंबई, नागपूर, अमरावती, कोल्हापूर या मोठ्या शहरांकडे धावत असतात. त्यात पुण्याला जाणाऱ्या प्रवाशांची संख्या सर्वाधिक आहे. परंतु, पुण्यात कोरोनाबाधित रुग्ण आढळल्याच्या बातम्या येऊन धडकल्यानंतर पुण्याकडे जाणाऱ्या प्रवाशांमध्ये अचानक ४० ते ५० टक्के घट झाल्याचे दिसून आले. पुण्याहून परभणीकडे येणारे प्रवाशी वाढले असल्याची माहिती बालाजी ट्रॅव्हल्स कंपनीचे बालाजी झरकर यांनी सांगितले.

बाजारातील गर्दी रोडावली
कोरोना विषाणूचा धसका शहरातील नागरिकांनीदेखील घेतला आहे. दररोजच्या बाजारपेठेत फिरकणाऱ्या तसेच खरेदीसाठी बाहेर पडणाऱ्यांची संख्याही रोडावली आहे. शहरात नुकत्याच सुरू झालेल्या सुपरशॉपीमध्येही म्हणावे तसे ग्राहक फिरकत नसल्याचे दिसत आहे.