हृदयविकाराचा झटका काल आला, आज चक्क मतदार रुग्णवाहिकेतून पोचला मतदानासाठी

कळंब (जि.उस्मानाबाद) : उस्मानाबाद जिल्हा मध्यवर्ती सहकारी बँकेच्या निवडणुकीसाठी येथील मध्यवर्ती प्रशासकीय इमारतीमध्ये रविवारी (ता.२०) मतदान प्रक्रिया पार पडत आहे. ह्रदयविकाराचा झटका (Heart Attack) आलेल्या सोसायटी मतदारसंघातील तालुक्यातील सौंदणा (आंबा) येथील रुग्णाला कार्डियाक रुग्णवाहिकेतून मतदानासाठी आणण्यात आले. या रुग्णावर अतिदक्षता विभागात उपचार सुरू होते. मधुकर पालकर सोसायटी मतदारसंघातील मतदार असून त्यांनी मतदानाचा हक्क बजावला. त्यांना शनिवार (ता.१९) हृदयविकाराचा झटका आल्याने रुग्णालयात दाखल करण्यात आले होते. उपचार घेत असलेल्या रुग्णांनाच मतदानासाठी मतदान केंद्रावर हजर केल्याने जीवापेक्षा मतदान भारी पडल्याचे बोलले जात आहे. यामुळे उस्मानाबाद जिल्हा मध्यवर्ती सहकारी बॅंकेची निवडणुकीची (Osmanabad District Cooperative Bank Election) चुरस देखील वाढली आहे. (Cardiac Patient Come By Ambulance For Osmanabad District Bank Election In Kalamb)

जिल्हा मध्यवर्ती सहकारी बँकेच्या निवडणुकीसाठी येथील प्रशासकीय इमारतीमधील मतदान केंद्रावर मतदान प्रक्रिया घेण्यात आली. अत्यंत चुरशीने मतदान होत असून शिवसेनेचे खासदार ओमप्रकाश राजेनिंबाळकर, भाजपचे युवा नेते मल्हार पाटील, ग्रामीण भागातील भाजपचे कार्यकर्ते तळ ठोकून होते. महाविकास आघाडी (Mahavikas Aghadi) व भाजपने सहलीवर नेलेले मतदार सकाळी मतदान केंद्रावर मतदानासाठी हजर केले. महाविकास आघाडीचे व भाजपचे कार्यकर्ते अद्याप किती मतदान झाले. किती होईल यावर बारीक नजर ठेवून होते. येथील केंद्रावर सोसायटी मतदारसंघाचे ७०, इतर सहकारी संस्था ३५ व बँक पतसंस्थेचे २५ असे १३० मतदार आहेत.

खासदार राजेनिंबाळकर, आमदार कैलास पाटील व भाजपचे आमदार राणाजगजितसिंह पाटील यांच्यासाठी ही निवडणूक प्रतिष्ठेची असून अत्यंत चुरशीने मतदान प्रक्रिया येथील केंद्रावर पार पडली. तालुक्यातील सौंदणा आंबा येथील सोसायटी मतदारसंघातील मधुकर पालकर यांना हृदयविकाराचा झटका आल्याने औषधोपचारासाठी रुग्णालयात उपचार सुरू होते. मतदान करून घेण्यासाठी कार्यकर्त्यांनी धावाधाव करीत हृदयविकाराच्या रुग्णाला चक्क कार्डियाक रुग्णवाहिकेतून मतदान केंद्रावर आणून मतदान घेण्यात आले. त्यामुळे जीवापेक्षा मतदान भारी म्हणण्याची वेळ आली आहे.