Maratha Reservation: मनोज जरांगे पाटलांची समजूत काढण्यात मुख्यमंत्री यशस्वी! 17 दिवसांनी उपोषण थांबलं पण...

जालना- मुख्यमंत्री एकनाथ शिंदे यांनी आज मनोज जरांगे पाटील यांची भेट घेतली. मुख्यमंत्र्यांनी आंदोलन स्थळी पोहोचतात मनोज जरांगे पाटील यांच्या तब्येतीची विचारपूस केली. मुख्यमंत्र्यांनी समजूत काढल्यानंतर अखेर मनोज जरांगे पाटील यांनी उपोषण मागे घेण्याचा निर्णय घेतला आहे. त्यामुळे गेले १७ दिवसांपासून सुरु असलेले उपोषण आता थांबणार आहे.

मुख्यमंत्र्याच्या हातून ज्यूस पिऊन मनोज जरांगे पाटील यांनी अखेर उपोषण सोडले आहे. असे असले तरी आंदोलन सुरुच राहणार असल्याचं त्यांनी स्पष्ट केलं. मराठा समाजाला सरसकट कुणबी प्रमाणपत्र मिळत नाही तोपर्यंत आंदोलन सुरुच राहील असं जरांगे पाटील यांनी म्हटलं. मुख्यमंत्री जरांगे पाटील यांचे उपोषण मागे घेण्यात यशस्वी झालेत. पण, आरक्षण एक महिन्यात न मिळाल्यास आंदोलन पुन्हा तीव्र करण्याचा इशारा जरांगे पाटील यांनी दिलाय.

मनोज जरांगे पाटील यावेळी बोलताना म्हणाले की, मी समाजाच्या हिताचाच निर्णय घेईन. मराठा समाजाला मी आरक्षण मिळवून देईन आणि तीच भूमिका मुख्यमंत्री एकनाथ शिंदे यांची आहे. मराठा समाजाला न्याय मिळवून देण्याची क्षमता कोणात असेल तर ती फक्त मुख्यमंत्री शिंदे यांच्यामध्ये आहे. त्यामुळे आपल्याला आंदोलन शांततेत करायचं आहे.

मराठा समाजाला आरक्षण मिळेपर्यंत मी माघार घेणार नाही. समाजाला विचारुन मी उपोषण मागे घेण्याचा निर्णय घेतला. त्यामुळे मी मराठा समाजाशी प्रामाणिक आहे. मराठा समाजाला केवळ एकनाथ शिंदे हेच न्याय मिळवून देतील असा मला विश्वास आहे. त्यांनी येथे येऊन ते सिद्ध केले आहे. मराठा समाजाला आरक्षण मिळवून देण्याचं आश्वासन त्यांनी दिलंय, असं जरांगे म्हणाले.

अंतरवाली सराटी येथे मुख्यमंत्री एकनाथ शिंदे यांच्या सोबत केंद्रीय रेल्वे राज्यमंत्री रावसाहेब दानवे, ग्रामविकासमंत्री गिरीश महाजन, मंत्री संदिपान भुंबरे, मंत्री उदय सामंत, मंत्री राधाकृष्ण विखे पाटील, आमदार राजेश टोपे, आमदार नारायण कुचे, माजी राज्यमंत्री अर्जुन खोतकर इत्याही नेते उपस्थित होते. (Latest Marathi News)