Mahavikas Aghadi: महाविकास आघाडीत पुन्हा धुसफूस? या महत्वाच्या जागेवर कॉंग्रेसचा दावा

Marathawada: दलित मतदारांच्या बहुसंख्येमुळे अनुसूचित जातीसाठी आरक्षित असलेल्या उमरगा मतदारसंघात काँग्रेसने तीन वेळाही दलित समाजाच्या कार्यकर्त्याला उमेदवारी दिली होती.

आता होणाऱ्या विधानसभा निवडणुकीसाठी हा मतदारसंघ कॉंग्रेसला मिळण्यासाठी प्रयत्न रहाणार असल्याने कार्यकर्त्यांनी मतदाराला देव आणि मतदार संघाला मंदिर समजुन सक्रियपणे काम करावे. असे आवाहन युवक काँग्रेसचे राष्ट्रीय समन्वयक महेश देशमुख यांनी केले.

उमरगा तालुका काँग्रेस समितीच्या वतीने गुरुवारी (ता. १८) कॉंग्रेस भवन येथे आयोजित केलेल्या कार्यकर्त्यांच्या बैठकीत श्री. देशमुख बोलत होते. कॉंग्रेसचे तालुकाध्यक्ष अँड. सुभाष राजोळे अध्यक्षस्थानी होते.

काँग्रेसचे जिल्हा उपाध्यक्ष विजयकुमार सोनवणे, उमरगा बाजार समितीचे माजी सभापती नानाराव भोसले, जेष्ठ नेते बलभिमराव पाटील, बापु शिंदे, संजय चालुक्य, विकास हराळकर, मधुकर यादव, राजू तोडकरे, अँड. अशोक पोतदार, प्रकाश चव्हाण, अजय वाघमारे आदींची उपस्थिती होती.

श्री. देशमुख यांनी पक्षांतर केलेल्या नेत्यावर टिका केली. कॉंग्रेस पक्षाने त्यांना भरभरून दिले होते ; तरीही त्यांनी पक्ष सोडला. नेत्याबरोबर कार्यकर्त्यांचे भावनिक नाते होते, परंतु त्यांनी कार्यकर्त्यांच्या भावनेचा विचार केला का ? असा प्रश्न करून श्री. देशमुख यांनी तालुक्यात काँग्रेसबरोबर जनमत आहे, त्यासाठी कार्यकर्त्यांनी सक्रिय रहावे.

विधानसभेसाठी इच्छूक असलेल्या कार्यकर्त्यांच्या उमेदवारासाठी आपण प्रयत्न करू पण ऐनवेळी महाविकास आघाडीतील दुसऱ्या पक्षाला उमेदवारी मिळाली तरी सर्वांनी एकसंघ राहिले पाहिजे. असे आवाहन केले.

या वेळी राजु तोडकरी, बलभिमराव पाटील, संजय चालुक्य, विजयकुमार सोनवणे, नानाराव भोसले, अशोक गायकवाड, संजय सरवदे आदींनी काँग्रेस पक्षाचा इतिहास सांगून, एका नेत्यामुळे पक्षाचे कार्य थांबत नाही. कार्यकर्त्यांनी पुन्हा नव्या जोमाने काम करण्याचे आवाहन केले. मधुकर यादव यांनी प्रास्ताविकात तालुक्याच्या काँग्रेस पक्षाच्या इतिहासाची माहिती सांगितली. मधुकर बिद्री यांनी आभार मानले.

काँग्रेससाठी जागा देण्याचा झाला ठराव

राहुल गांधी यांची संसदेच्या विरोधी नेतेपदी निवड झाल्याने बैठकीत तालुकाध्यक्ष अँड. राजोळे यांनी अभिनंदनाचा ठराव मांडला तसेच उमरगा विधानसभा मतदारसंघाची जागा काँग्रेस पक्षाला देण्याचा ठराव मांडला, त्याला सर्वानुमते संमती दिली. युवक काँग्रेसच्या राष्ट्रीय समन्वयकपदी निवड झाल्याने महेश देशमुख यांचा सत्कार करण्यात आला. या वेळी विधानसभा निवडणुकीसाठी इच्छूक असलेले विजय वाघमारे यांचे भाषण झाले, त्यांनी निष्ठावंत व सामान्य कार्यकर्त्याला संधी देण्याची मागणी केली.