चिंताजनक! मराठवाड्यात सलग दोन दिवस कोरोना रुग्णांची संख्या वाढली

औरंगाबाद: मराठवाड्यात गुरुवारी (ता. २४) दिवसभरात ४८७ कोरोनाचे रुग्ण आढळले. जिल्हानिहाय वाढलेल्या रुग्णसंख्येत बीड १५१, औरंगाबाद ११५, उस्मानाबाद ८०, परभणी ५१, लातूर ४०, जालना २४, नांदेड २०, हिंगोली ६ जणांचा समावेश आहे. आणखी आठ जणांचा उपचारादरम्यान मृत्यू झाला. त्यात बीडमधील चार, औरंगाबादेत दोन, परभणी- उस्मानाबादेतील प्रत्येकी एकाचा समावेश आहे.

औरंगाबादेत ११५ बाधित-
औरंगाबाद जिल्ह्यात ११५ रुग्णांची भर पडली. त्यात शहरातील २६, ग्रामीण भागातील ८९ जण आहेत. रुग्णांची संख्या १ लाख ४५ हजार ७८१ झाली. आणखी १०० जण बरे झाले. त्यात शहरातील २०, ग्रामीण भागातील ८० जणांचा समावेश आहे. आजपर्यंत १ लाख ४१ हजार ४७० रुग्ण बरे झाले आहेत.

सध्या ९०५ जणांवर उपचार सुरू आहेत. आणखी दोघांचा मृत्यू झाला. त्यात गारखेडा येथील पुरूरुष (वय ४५), शेवता (ता. पैठण) येथील महिलेचा (४०) समावेश आहे. आतापर्यंत ३ हजार ४०६ जणांचा कोरोनाने बळी घेतला आहे.