मराठवाड्यात कोरोनाचा प्रसार पुन्हा वाढला; बीडमधील स्थिती चिंताजनक

औरंगाबाद: मराठवाड्यात शुक्रवारी (ता. २५) दिवसभरात कोरोनाचे ४११ नवे रुग्ण आढळले. त्यात बीडमधील सर्वाधिक १७६ रुग्णांचा समावेश आहे. औरंगाबादेतील ६६, लातूर ५०, उस्मानाबाद ४६, परभणी ३६, जालना २३, नांदेड आठ, हिंगोलीतील सहा रुग्ण आहेत. उपचारादरम्यान आणखी १८ जणांचा मृत्यू झाला. त्यात बीडमध्ये ८, जालना ४, औरंगाबाद ३, परभणी- लातूर- उस्मानाबादेतील प्रत्येकी एकाचा समावेश आहे.

औरंगाबादेत ६६ बाधित -
औरंगाबाद जिल्ह्यात ६६ कोरोनाबाधित आढळले. त्यात शहरातील १३, ग्रामीण भागातील ५३ जण आहेत. रुग्णांची संख्या १ लाख ४५ हजार ८४७ वर पोचली. शहरातील २० तर ग्रामीण भागातील ९२ असे ११२ रुग्ण बरे झाले. आजपर्यंत १ लाख ४१ हजार ५८२ रुग्ण बरे झाले आहेत.

सध्या ८५६ जणांवर उपचार सुरू आहेत. दरम्यान, आणखी तिघांचा मृत्यू झाला. त्यात मोंढा गंगापूर येथील पुरुष (वय ४४), वैजापूर येथील महिला (६५), चिंचोली (ता. कन्नड) येथील महिलेचा (४६) समावेश आहे. आजपर्यंत ३ हजार ४०९ जणांचा कोरोनाने बळी घेतला आहे.