ओळखीचा फायदा घेत तिघांची केली फसवणूक, आरोपीस अटक

अहमदपूर : शहरातील एका व्यक्तीने ओळखीचा फायदा घेऊन बऱ्याच लोकांची फसवणूक केली असून या व्यक्तीस अटक करण्यात आली आहे.शहरातील आंबेजोगाई रोडवर राहत असलेल्या गोवर्धन व्यंकट काळे (26 वर्ष) यांनी मागील चार दिवसात तिघांची फसवणूक केली आहे. येथील सराफा व्यापारी गजानन कामठेवाड यांच्या सराफा दुकानातून एक लाख 20 हजार किंमतीची 22 ग्रॅम वजनाची गळ्यातील साखळी दुकानातून घेतली व वडिलांना दाखवून आणतो म्हणून निघून गेला.

दुस-या घटनेत शहरातील शिक्षक राम रावण भगत यांच्या हातातील 52 हजार रूपये किंमतीची दहा ग्रॅम वजनाची अशाच प्रकारची अंगठी मला बणवायची आहे म्हणून घेऊन गेला तर तिस-या घटनेत रवि खोमणे यांच्या दुकानातून विंधन विहिरीच्या दोन मोटारी किंमत 42 हजार 500 लगेच पैसे आणून देतो म्हणून घेऊन गेला. वरील तिन्ही व्यक्तीस गोवर्धन काळे परत भेटलेच नाहीत. आपली फसवणूक झाल्याचे वरील तिघांना लक्षात आल्याने त्यांनी आरोपी विरोधात गुन्हा नोंद केला असून पुढील तपास पोलीस निरीक्षक चितंबर कामठेवाड यांच्या मार्गदर्शनाखाली पोलीस सुहास बेंबडे करीत आहेत.

असा सापडला आरोपी

शहरातील जिल्हा मध्यवर्ती बँकेत आरोपीने गुरुवारी (ता. 21 ) मेन कापडाच्या पिशवीत कागदाचे गट्टे भरून यात नोटा असल्याचे भासवले. मला ही रक्कम बँकेत ठेवायची आहे असे म्हणत आरोपीने बँकेतील कर्मचा-यास पिशवी देण्याचा बहाणा करीत हातातील अंगठी काढून घेतली व पळ काढला, परंतु त्यास इतर कर्मचाऱ्यांनी पकडले. आरोपीने चोरलेल्या सर्व वस्तू गंगाखेड या गावी विकल्या असल्याचे सांगीतले. पोलिसांनी आरोपीस गंगाखेड येथे नेले असता चोरलेल्या वस्तू विक्री केलेले ठिकाण आरोपीने सांगीतले असून पुढील तपास चालू आहे.