आईच्या निधनाचे दुःख सहन न झाल्याने हृदयविकाराने लेकीचा मृत्यू

परभणी : आईच्या निधनानंतर मुलीनेही प्राण सोडल्याची धक्कादायक घटना परभणी (Parbhani) जिल्ह्यातील फुलकळस (ता.पूर्णा) येथे घडली आहे. या घटनेमुळे गावावर शोककळा पसरली आहे. गयाबाई सारंग स्वामी यांचे रविवारी (ता.सहा) सकाळी निधन झाले. त्यांच्या पश्चात तीन मुले, तीन मुली, नातवंडे असा परिवार आहे. डोंगरगाव (ता.लोहा) येथील मोठी मुलगी भागिरथी गंगाधर मठपती यांना त्यांच्या आईचे निधनाची माहिती देण्यात आली. त्या रविवारीच फुलकळस येथे पोचल्या. दुपारी आई गयाबाई यांच्या पार्थिवावर अंत्यसंस्कार करण्यात आले. त्यानंतर सर्वजण घरी परतले. भागिरथी मठपती यांना आई गेल्याचे दुःख अनावर झाले. (Daughter Died After Mother Demise In Purna Taluka Of Parbhani)

त्यांना अस्वस्थ वाटू लागल्याने नातेवाईकांनी नांदेड (Nanded) येथील खासगी रुग्णालयात उपचारासाठी दाखल केले. मात्र सायंकाळी सहा वाजण्याच्या सुमारास भागिरथी मठपती यांना हृदयविकाराचा झटका आला आणि त्यात त्यांचे निधन झाले. त्यांच्यावर त्यांच्या गावी डोंगरगाव येथे सोमवारी (ता.सात) अंत्यसंस्कार करण्यात आले. त्यांच्या पश्चात पती, एक मुलगा, दोन मुली, सून, जावई आणि नातवंडे असा परिवार आहे.