Latest Dharashiv News: जिल्ह्यातील बलात्काराच्या घटना वाढतच चालल्या असून गेल्या महिनाभरात जिल्ह्यात एकूण आठ महिला, मुलींवर बलात्कार झाले आहेत. गंभीर बाब म्हणजे पीडितांमध्ये एका तीन वर्षांच्या मुलीसह ४ अल्पवयीन मुलींचा समावेश असून अत्याचार करण्यात ओळखींच्या लोकांचेच प्रमाण अधिक असल्याचे दाखल गुन्ह्यातून स्पष्ट होत आहे.
गेल्या महिन्यात बदलापूरसह काही ठिकाणी झालेल्या बलात्कारांच्या घटनांमुळे राज्यात संताप निर्माण झाला होता. त्यानंतरही या घटना नियंत्रणात येण्याचे नाव घेत नसून जिल्ह्यातील मुलींवरील अत्याचारांच्या घटना वाढल्याची स्थिती आहे. एका अल्पवयीन मुलीवर ज्येष्ठ नागरिकाने अत्याचार केल्याची घटना तुळजापूर येथे मंगळवारी (ता. १७) घडली आहे. याप्रकरणी पोस्कोंतर्गत गुन्हा दाखल करण्यात आला आहे.