नांदेडचे दोन युवक मित्रांसोबत पोहायला गेले आणि शेततळ्यात... 

हिंगोली : वसमत तालुक्यातील बागल पार्डी येथे एका शेततळ्यात बुडून दोन युवकांचा म्रुत्यु झाल्याची घटना मंगळवारी (ता. 10) दुपारी साडेतीन वाजता घडली.

याबाबत अधिक माहिती अशी की, नांदेड येथील पाच ते सहाजण बागल पार्डी येथील मित्रांसोबत मंगळवारी बागल पार्डी येथे आले होते. ते पंचायत समितीचे उपसभापती विजय नरवाडे यांच्या शेतात असलेल्या शेततळ्यात पोहण्यासाठी गेले.

त्यापैकी अवधूत कोयलवार (वय 21) व अनिल खरे (वय 20) (दोघे राहणार पोर्णिमानगर, नांदेड) यांना पाण्याचा अंदाज आला नाही. ते घाबरून गेले व पाण्यात बुडाले. 

पुन्हा एका बालिकेवर अत्याचार.. वाचा कुठे

त्यानंतर आरडाओरडा झाल्याने परिसरातील शेतकरी धावून आले. घटनेची माहिती कुरूंदा पोलिसांना कळताच सहाय्यक पोलीस निरीक्षक सुनील गोपीनवार व बिट जमादार बी.टी. केद्रे यांनी घटनास्थळी धाव घेतली.

पोलिसांनी दोन्ही मृतदेह पाण्यातून वर काढले व पुढील कार्यवाहीसाठी कुरुंदा येथील आरोग्य केंद्रात नेले आहेत. याबाबत कुरूंदा पोलिस ठाण्यात घटनेची नोंद करण्याची प्रक्रिया उशिरापर्यंत सुरू होती.