लॉकडाऊनच्या काळात गावठी दारुचा महापूर

नांदेड : लॉकडाऊनच्या काळात जिल्ह्यातील सर्व देशी, विदेशी दारु, बिअरबार तसेच परमिटरुम बंद केल्याने तळीरामांनी गावठी दारुकडे मोर्चा वळवला आहे. यामुळे गावठी दारुचा महापूर जिल्ह्यात वाहत आहे. मुखेड तालुक्यातील कोटग्याळवाडी तांडा येथे एकाच दिवशी पाच ठिकाणी धाड टाकून मुक्रमाबाद पोलिसांनी ४२ हजार रुपये किमंतीची मोहफुलाची गावठी दारु जप्त केली. ही कार्यवाही गुरुवारी (ता. नऊ) सकाळी सहा ते साडेसातच्या सुमारास केली.

पाच ठिकाणी टाकली धाड
कोटग्याळवाडी तांडा येथे यापूर्वीही पोलिसांनी गावठी दारुची भट्टी उध्वस्त केली होती. या नंतरही पुन्हा मोहफुलाची गावठी दारु गाळण्याचा उद्योग सुरु केल्याचा सुगावा पोलिसांनी लागला. यामुळे गुरुवारी सकाळी सव्वासहा वाजता केलेल्या कारवाइत आरोपींनी दहा हजार रुपयांची गावठी दारु बेकायदेशीररित्या विक्रीच्या उद्देशाने बाळगल्याचे आढळून आले. या प्रकरणी सहायक पोलिस निरीक्षक कमलाकर गड्डीमे यांच्या फिर्यादीवरुन गुन्हा दाखल करण्यात आला आहे. दुसऱ्या घटनाही त्याच तांडावर घडली. साडेसहा वाजता अकरा हजाराची गावठी दारु पोलिसांनी जप्त करुन गुन्हा दाखल केला. ह

हेही वाचा.....शेतकऱ्यांच्या खत, बियाणांची व्यवस्था बांधावर करा

एकाच तांडावर दोनवेळा कारवाइ
तिसऱ्या घटनेत सकाळी सव्वासात वाजता साडेदहा हजाराची मोहफुलाची गावठी दारु जप्त केली. या प्रकरणी फौजदार गोपीनाथ वाघमारे यांच्या फिर्यादीवरुन गुन्हा दाखल करण्यात आला आहे. चौथी घटनाही याच तांडावरील घडली. पोलिसांनी धाड टाकून साडेपाच हजाराची गावठी दारु जप्त केली. पाचव्या घटनेत सकाळी सात वाजुन वीस मिनीटाला पोलिसांनी धाड टाकून पाच हजाराची गावठी दारु पकडली. या प्रकरणी सपोनी श्री गड्डीमे यांच्या फिर्यादीवरुन गुन्हा दाखल झाला आहे. 

हेही वाचलेच पाहिजे.... कोरोनामुळे लॉकडाऊन : अस्वस्थ प्रश्नांची मालिका

मुक्रमाबाद पोलिस ठाण्यात गुन्हा दाखल 
या पाच प्रकरणात सहायक पोलिस निरीक्षक कलमाकर गड्डीमे, फौजदार गोपीनाथ वाघमारे व जमादार नागनाथ सुर्यतळ यांच्या फिर्यादीवरुन मुक्रमाबाद पोलिस ठाण्यात गुन्हा दाखल करण्यात आला आहे. याचा तपास पोलिस जमादार श्री सुर्यतळ, श्री. आडेकर करीत आहेत.

खात्यातील ३८ हजार पळविले
भारतीय स्टेट बॅंकेच्या तरोडा बुद्रुक शाखेतून एका कर्मचाऱ्याच्या खात्यातील ३८ हजार ६४१ रुपये (ता. २२) मार्च ते (ता. २६) मार्च या कालावधीत ऑनलाइन पद्धतीने काढल्याचा प्रकार घडला आहे. या बाबत दीपनगर येथील दयानंद रामराव मोरे या कर्मचाऱ्याने भाग्यनगर पोलिस ठाण्यात दिलेल्या फिर्यादीवरून गुन्हा दाखल करण्यात आला आहे. तपास फौजदार एल. एन. बोनवाड करीत आहेत. 

पंधरा हजाराची देशी दारु पकडली
मुखेड जवळील हॉटेल चंद्रमा बारजवळ एका माळावर विनापरवाना विक्रीसाठी साठविलेली पंधरा हजार ६८० रुपयांची देशी दारु पोलिसांनी गुरुवारी दुपारी चार वाजता धाड टाकून पकडली. या प्रकरणी सहायक फौजदार गोविंद मुंडे यांच्या फिर्यादीवरुन मुखेड पोलिस ठाण्यात गुन्हा दाखल करण्यात आला आहे.