सेलू : एसटी संपामुळे ग्रामीण शालेय विद्यार्थ्यांचे शैक्षणिक नूकसान

सेलू : कोरोनाच्या प्रादुर्भावामुळे तब्बल बावीस महिन्यानंतर प्राथमिक आणि माध्यमिक शाळा सुरू होत असतांनाच मागील एक महिण्यापासून एसटीचा संप सुरू असल्याने ग्रामीण भागातील शालेय विद्यार्थ्यांना शहरातील शाळेत येता येत नाही. शालेय विद्यार्थ्यांचे शैक्षणिक नूकसान होत आहे.

कोरोनाच्या पार्श्वभूमीवर तब्बल बावीस महिने संपूर्ण शाळा बंद होत्या. नंतर शहरी भागातील आठवी ते बारावीचे वर्ग सुरू झाले. त्यानंतर (ता.०१ ते ता.२१) नोव्हेंबरपर्यंत दिवाळीच्या सुट्या देण्यात आल्या होत्या. त्यानंतर (ता.२२) नोव्हेंबरपासून सर्व वर्ग नियमित सुरू करण्यात आले. आता ग्रामीण भागातून शहरात येणाऱ्या हजारो विद्यार्थ्यांना सुरळीत शिक्षण सुरू झाले असे वाटत होते.

मात्र महामंडळ कर्मचार्‍यांच्या संपामुळे तब्बल ३५ दिवसांपासून बस वाहतूक बंद असल्याने विद्यार्थ्यांना गैरसोयींना सामोरे जावे लागत आहे. ग्रामीण भागातून शहरात आणि आपल्या गावातून दुसऱ्या गावात असलेल्या माध्यमिक शाळेत जाण्यासाठी मानव विकासची बस वाहतूक देखील संपामुळे बंद असल्याने सहावी ते बारावीमध्ये शिकत असलेल्या सुमारे आठ ते दहा हजार विद्यार्थ्यांच्या शिक्षणाचा प्रश्न बिकट झाला आहे.

ग्रामीण विद्यार्थांना शहरी भागातील शाळांमध्ये येता येत नसल्याने शाळा ओस पडल्या आहेत. दुसरीकडे खासगी वाहतूकदारांनी तिकीट भाडे दुप्पट केल्याने पालकांची चांगलीच गोची झाली आहे. अगोदरच ऑगस्ट आणि सप्टेंबर महिण्यात झालेल्या अतिवृष्टीमुळे खरिपातील पिकांचे नुकसान झाल्याने शेतकरी आर्थिक संकटात सापडला आहे. अशा परिस्थितीत आपल्या मुलांना रोज खासगी वाहतुकीने शाळेत पाठवण्याचा खर्च त्यांना परवडणारा नाही. तसेच शहरातील खासगी गुरुकुलमध्येही फी भरणे अवघड असल्याने ग्रामीण भागातील गोरगरीब विद्याथ्यांचे शैक्षणिक जीवन धोक्यात आले आहे.

तालुक्यात प्राथमिक आणि माध्यमिक जिल्हा परिषद व खासगी शाळांची संख्या १८९ इतकी असून जवळपास ३५ हजार विद्यार्थी त्यामध्ये शिक्षण आहेत. यात आठ ते दहा हजार विद्यार्थी इयत्ता आठवी ते बारावी वर्गातील असल्याची माहिती आहे.