Accident News : आयशर शिवशाही बसचा अपघात ; २ गंभीर जखमी, २१ प्रवासी किरकोळ जखमी

सिंदखेड राजा : छत्रपती संभाजी नगर नागपूर राष्ट्रीय महामार्गावर असलेल्या किनगांव राजा ता.सिंदखेड राजा गावाजवळ रात्री ९.३० च्या दरम्यान आयशर व शिवशाही बसचा अपघात होऊन २ जण गंभीर जखमी असून शिवशाही बस मधील प्रवाशांना किरकोळ दुखापत झाली असून त्यांना स्थानिक प्राथमिक आरोग्य केंद्रामध्ये दाखल करण्यात आले आहे. सविस्तर वृत्त असे की शिवशाही बस क्रमांक एम.एच ०९ ई. एम.२१२५ ही छत्रपती संभाजीनगर वरून रिसोडला जात होती तर आयशर क्रमांक एम.एच २० ई.जी ८८११ मेहकर वरून छत्रपती संभाजीनगरला जात होते.

किनगांव राजा जवळ असलेल्या पेट्रोल पंपाच्या जवळ दोन्ही वाहनाचे समोरासमोर धडक होऊन आयशर चालक अरमान एस.शेख रा.छत्रपती संभाजीनगर हे जबर जखमी झाले आहेत त्यांना तात्काळ सिंदखेडराजा येथील ग्रामीण रुग्णालयांमध्ये उपचारासाठी दाखल करण्यात आले होते, पुढील उपचारासाठी जालना येथे दाखल करण्यात आले असून त्यांची प्रकृती चिंताजनक आहे.शिवशाही बस चालक के.टी.देशमुख, वाहक जी.एल.नेहवाल यांच्यासह इतर जखमी झाले आहेत.

शिवशाही बस मध्ये एकुण २० ते २१ प्रवासी प्रवास करत होते. सिंदखेड राजा जवळ नालासोपारा वाशिम ही बस ब्रेकडाऊन झाली असल्यामुळे या बसमधील ७ ते ८ प्रवासी सुध्दा बसमध्ये होते.अपघाताची माहिती मिळताच ठाणेदार विनोद नरवाडे, पोलीस कर्मचारी विष्णू मुंढे,शरद ठोंबरे,शिवाजी बारगजे, मिलिंद सोनपसारे,नाजीम चौधरी यांच्यासह पोलीस कर्मचाऱ्यांसह ग्रामस्थांनी अपघातग्रस्तांना मदत करून रुग्णालयात दाखल केले होते.