RS 2000 Note Exchange : दोन हजारांच्या नोटा बदलण्यास सुरुवात; नागरिकांच्या बॅंकेत लागल्या रांगा

जालना : भारतीय रिझर्व्ह बँकेने दोन हजारांच्या नोटा चलनातून मागे घेण्याचा निर्णय घेतला. त्यानंतर आता दोन हजारांच्या नोटा बँकेत जमा करण्यासाठी पहिल्याच दिवशी म्हणजे मंगळवारी (ता.२३) रांगा लागल्याचे चित्र पाहण्यास मिळाले. शिवाय पेट्रोल पंपावर ही दोन हजारांच्या नोटा ग्राहकांकडून देताना दिसून आल्या.

पंतप्रधान नरेंद्र मोदी यांनी नोव्हेंबर २०१६ मध्ये नोटबंदीचा निर्णय जाहीर केला होता. त्याकाळात सर्वात मोठे चलन असलेल्या एक हजार तसेच पाचशे रुपयांच्या नोटा चलनातून बाद झाल्या होत्या. तर चलनाची मागणी पूर्ण करण्यासाठी भारतीय रिझर्व्ह बँकेने तेव्हा दोन हजारांची नोट चलनामध्ये आणली होती. नोटबंदीच्या काळात चलनातून बाद झालेल्या नोटा जमा करण्यासह नवीन नोटा घेण्यासाठी बँकेवर लोकांच्या रांगा लागल्याचे चित्र पाहण्यास मिळाले होते.

नोटबंदीच्या निर्णयानंतर सात वर्षानंतर भारतीय रिझर्व्ह बँकेने दोन हजारांची नोट चलनातून मागे घेतली आहे. या दोन हजारांच्या नोटा ता. २३ मे ते ता.३० सप्टेंबर या दरम्यान बँकेतून बदलून घेण्याची मुभा रिझर्व्ह बँकेने दिली आहे. एका वेळी वीस हजार रुपयांच्या दोन हजारांच्या बँकेत जमा करणे किंवा बदलण्यास मुभा दिली आहे.

बँकेत मंगळवारपासून (ता.२३) दोन हजारांच्या नोट बदलण्यास सुरवात झाली. पाहिल्याच दिवशी दोन हजारांच्या नोटा बँकेत जमा करण्यासह बदलून घेण्यासाठी नागरिकांची गर्दी झाली होती. शिवाय चलनात मागील अनेक दिवसांपासून न दिसणारी दोन हजारांच्या पेट्रोल पंपावर नागरिकांकडून देण्यात येत असल्याचे चित्र आले आहे.

नोटा जमा करण्यासाठी मोठा कालावधी

दोन हजारांच्या नोटा चलनातून मागे घेतल्यानंतर रिझर्व्ह बँकेने या दोन हजारांच्या नोटा बँकेत जमा करण्यासाठी मोठा कालावधी उपलब्ध करून दिला आहे. ता.३० सप्टेंबरपर्यंत या नोटा बँकेत जमा करण्याची मुदत आहे. त्यामुळे दोन हजारांच्या नोटा जमा करण्यासाठी चार महिन्यांपेक्षा कालावधी देण्यात आला आहे. त्यामुळे नागरिकांनी ही नोटा बँकेत जमा करण्यासह बदलून घेण्यासाठी बँकेत गर्दी न केलेली बरी.