परभणी जिल्ह्यात वाॕट्सअपला स्टेटस ठेऊन शेतकऱ्याची आत्महत्या !

सोनपेठ ( जिल्हा परभणी ) : कर्ज फेडीसाठी धमक्यांच्या त्रासाला कंटाळून तरुण शेतकऱ्याने विष प्राशन करून आपली जिवनयात्रा संपवल्याची अत्यंत दुर्दैवी घटना मंगळवार (ता. दोन) रोजी दुपारी तालुक्यातील तिवठाणा येथे घडली. चंद्रकांत उर्फ मुंजाजी भगवान धोंडगे ( वय ३० वर्षे ) असे आत्महत्या केलेल्या शेतकऱ्याचे नाव आहे. धक्कादायक म्हणजे सुसाईड नोटचे व्हाट्सअपला स्टेट्स ठेऊन त्याने विषारी द्रव्य प्राशन करुन आत्महत्या केली. 

सोनपेठ तालुक्यातील तिवठाणा येथिल तरुण चंद्रकांत उर्फ मुंजाजी भगवान धोंडगे याने मंगळवारी दुपारी साडेबाराच्या सुमारास आपल्या व्हाट्सअपला स्टेट्सवर मी शेतात आहे, माझी उद्या सकाळी माती आहे. सर्वांनी यावे. मला पैश्यामुळे धमक्या येत आहेत, म्हणून मी आत्महत्या करत आहे.
माझ्या मुलांचा सांभाळ करावा, पैश्यामुळे मला त्रास झाला असा मजकूर असलेल्या चीठ्यांचे फोटो स्टेट्सवर ठेवले. यानंतर त्याने शेतात विषारी द्रव्य प्राशन केले.

चंद्रकांत याने व्हाट्सअपवर ठेवलेल्या स्टेट्सची माहिती त्याचे चुलते हनुमान गणपतराव धोंडगे यांना मिळताच त्यांनी शेतात धाव घेतली. अत्यवस्थ चंद्रकांतला त्यांनी दुपारी दीड वाजण्याचे सुमारास गंगाखेड उपजिल्हा रुग्णालयात दाखल केले. येथे निवासी वैद्यकीय अधिकारी डॉ. स्वाती मुंडे यांनी त्याला तपासून मृत घोषीत केले. त्याच्या पश्चात पत्नी, सहा वर्षीय मुलगा, दोन वर्षीय मुलगी,एक भाऊ, एक विवाहित बहीण असा परिवार आहे. गंगाखेड पोलीस ठाण्याचे हवालदार एम. जी. सावंत, हवालदार गोविंद मुरकुटे यांनी पंचनामा केला. या अनुषंगाने आवश्यक कागदपत्रे सोनपेठ पोलिसांच्या ताब्यात घेतले असून पोलिस पुढील तपास करीत आहेत. 

संपादन- प्रल्हाद कांबळे