वडिलांच्या वर्षश्राद्धाचा कार्यक्रम झाला आणि मुलाने केली आत्महत्या

माजलगाव (जि.बीड) : मागील तीन ते चार दिवसांपूर्वी वडिलांच्या वर्षश्राद्धाचा कार्यक्रम झाला आणि मुलगा ज्ञानेश्वर बाबुराव महागोविंद (वय ३३) यांनी विष प्राशन करत आत्महत्या केल्याची घटना तालुक्यातील राजेवाडी येथे शुक्रवारी (ता.१७) घडली आहे. या घटनेने राजेवाडीत हळहळ व्यक्त करण्यात येत आहे. तालुक्यातील (Majalgaon) राजेवाडी येथील शेतकरी ज्ञानेश्वर बाबुराव महागोविंद यांना दोन एकर कोरडवाहू शेतजमीन आहे. या शेतात ते कपाशी, सोयाबीन, तूर, मूग, उडीद असे (Beed) पारंपरिक पिकांची लागवड करतात. मागील वर्षी अतिवृष्टी झाल्यामुळे शेतातील पुरते उत्पन्न हाती आले नाही. परिणामी त्यांनी खासगी बॅंकेकडुन कर्ज घेतले. (Farmer Committed Suicide In Majalgaon Taluka Of Beed)

हे कर्ज फेडणे जिकीरीचे जात असल्यामुळे आणि कर्जबाजारीपणात गेलेल्या या शेतकऱ्याने टोकाचे पाउल उचलत विष प्राशन करून आत्महत्या केली. मागील वर्षीच ज्ञानेश्वर यांचे वडील बाबुराव महागोविंद यांनी देखील कर्जबाजारीपणास कंटाळुनच आत्महत्या (Farmer Suicide) केली आहे. या घटनेने राजेवाडी गावावर शोककळा पसरली आहे.

दरम्यान ज्ञानेश्वर महागोविंद यांच्या पश्चात वृध्द आई, पत्नी, दोन मुले, एक मुलगी असा परिवार आहे. मृत्युची नोंद दिंद्रुड पोलिस ठाण्यात करण्यात आली असुन पुढील तपास सहायक पोलिस निरीक्षक प्रभा पुंडगे या करित आहेत.