दुर्दैवी! बीडमध्ये कार-दुचाकीच्या अपघातात बाप-लेकाचा मृत्यू

केज (केज): केज-मांजरसुंबा राष्ट्रीय महामार्गावरील उमरी पाटीजवळ दुचाकीला एका कारने जोराची धडक दिल्याने सोमवारी (ता.१६) सायंकाळी साडेसात वाजेच्या सुमारास अपघात झाला. यात दुचाकीवरील बाप-लेकांचा मृत्यू झाला तर मुलगी जखमी झाली. सिय्याम सय्यद (वय ३५) आणि अमन सय्यद (वय १४) अशी मृतांची नावे आहेत.

तालुक्यातील शिंदी येथील सियाम हे त्यांचा मुलगा अमन व मुलगी मुस्कान यांना घेऊन सोमवारी सायंकाळी दुचाकीने शिंदी गावाकडे जात होते. त्यांची दुचाकी पद्मश्री डॉ. विठ्ठलराव पाटील सहकारी साखर कारखान्याजवळील उमरी पाटीजवळ आली असता समोरून भरधाव वेगात येणाऱ्या कारची (एमएच-०५, सीए-३३८६) त्यांना धडक बसली.

या अपघातात दुचाकीवरील सिय्याम सय्यद यांचा जागीच मृत्यू झाला तर त्यांची मुलगी मुस्कान (१२) व मुलगा अमन हे गंभीर जखमी झाले होते. रात्रीची वेळ असल्याने जखमींना उपचारासाठी रुग्णालयात दाखल करण्यास काहीसा विलंब झाला. त्यांना उपचारासाठी अंबाजोगाई येथे शासकीय रुग्णालयात घेऊन गेले असता मुलगा अमन सय्यद याचा उपचारादरम्यान मृत्यू झाला.