Gangapur Rain News : गंगापूर तालुक्यात एकाच रात्रीत ४८२ मिमी पावसाची नोंद

गंगापूर : शहरासह तालुक्यात अनेक दिवसांच्या प्रतीक्षेनंतर सोमवारी (ता. २६) दहा वाजेच्या सुमारास मुसळधार पाऊस झाल्याने तालुक्यातील शेतकर्‍यांच्या पिकांचे अतोनात नुकसान झाले. तालुक्यात एकाच दिवसात ४८२ मिमी पावसाची नोंद झाली आहे.

गंगापूर महसूल मंडळात सर्वाधिक ७३ मिमी पाऊस झाला. तसेच गंगापूर शहरातील अंतर्गत रस्त्यावर पाणी साचून अनेक गाळ्यांत पाणी साचले होते. अचानक झालेल्या पावसाने नागरिकांची चांगलीच दामझाक उडाली.

आज दिवसभर खरीप हंगामामधील सुरू असलेल्या पीक काढणीच्या कामात व्यत्य आला. दरम्यान, ऊस तोडीसाठी बीड, सोलापूर, विदर्भ, मराठवाड्यातून आलेल्या ऊसतोड मजुरांच्या झोपडीत पाणी जाऊन त्यांचे मोठे नुकसान झाले.

जीवनावश्यक वस्तूही भिजल्याने त्यांना सुरक्षित ठिकाणचा निवारा शोधावा लागला. तालुक्यात झालेल्या पावसानंतर आज पहाटेच्या सुमारास पुन्हा जोरदार पावसाने हजेरी लावली. या अवकाळी पावसामुळे खरीप हंगामातील भुईमूग,

सोयाबीन अन्य पिकांची सुरू असलेल्या काढणीत व्यत्यय आला आहे. काही ठिकाणी शेतात पाणी साचून राहिल्याने काढणी ठप्प झाली आहे. यात सर्वात मोठा फटका कांदा पिकाला बसला असून, कांद्याचे रोपेच उन्मळून पडले आहेत.

शहरात वीजगूल आणि नाल्या पॅक

शहरात मध्यरात्रीपासूनच विजेचा लंपडाव सुरू होता. पहाटेपासून पुन्हा वीज गेली. सकाळी नऊ वाजता वीज आली. पालिका प्रशासनाने गटारी स्वच्छ न केल्याने अनेक भागातील गटारी जाम झाल्याचा प्रकार घडला. त्यामुळे अनेक सखल भागातील गाळयात पाणी सचण्याचा प्रकार झाला. त्यामुळे पालिका प्रशासनावर नागरिकांचा रोष वाढला आहे.

गंगापूर तालुक्यात झालेला पाऊस

• गंगापूर : ७३

• मांजरी : ६८

• भेंडाळा : ३५

• सी. वाडगाव : ३५

• वाळूज : ५६

• डोणगाव : ३५

• शेंदूरवादा : ४९

• हर्सूल : ६२

• तुर्काबाद : ६९