बीडमधील परळीत गांजाची सामुहिक शेती, दोघांना घेतले ताब्यात

परळी (जि.बीड) : परळीत पुन्हा चार जणांच्या शेतामध्ये गांजाची लागवड केल्याचा प्रकार समोर आला आहे. एकीकडे पाच दहा ग्राम गांजावरून (Ganja) राज्यभर आरोप-प्रत्यारोप आरोप सुरू असताना बीड जिल्ह्यात चक्क गांजाचीची सामूहिक शेती होत असल्याचा धक्कादायक प्रकार उघडकीस आला आहे. या परळी ग्रामीण पोलिसांनी 2 क्विंटलपेक्षा जास्त गांजा जप्त करत दोघांना अटक केली आहे. तालुक्यातील मोहा या गावात अफूची सामूहिक शेती होत असल्याचा प्रकार काही दिवसांपूर्वी उघडकीस आला होता. शेकडो एकर जमिनीवर अफूची शेती होत असल्याचे समोर आल्यानंतर शंभरपेक्षा अधिक शेतकऱ्यांवर गुन्हे दाखल झाले होते. आता याच तालुक्यात (Crime In Beed) पुन्हा गांजाची शेती आढळून आल्याने खळबळ माजली आहे.

राज्याचे सामाजिक न्यायमंत्री धनंजय मुंडे यांच्या मतदारसंघात असलेल्या मोहा या गावात जवळपास दहा ते बारा वर्षांपूर्वी अफूच्या लागवडीवरुन मोठी कारवाई करण्यात आली होती. या प्रकरणी मोह्यातील अनेक शेतकऱ्यांवर गुन्हे दाखल करण्यात आले होते. यानंतर या आठवड्यात ग्रामीण पोलीसांनी धाडसी कारवाई करत बुधवारी (ता.२७) तालुक्यातील गुट्टेवाडी येथील शेतकरी भाऊसाहेब दत्ता गुट्टे यांच्या तुरीच्या शेतातील पिकात सात गांज्याची झाडे लावण्यात आली होती. या शेतात छापा टाकून ती जप्त करण्यात आली. या झाडांचे वजन १ क्विंटल ७ किलो असून बाजार भावानुसार ४ लाख २८ हजार रुपये किंमतीची ही झाडे असून सहायक पोलीस निरीक्षक मारोती मुंडे यांच्या फिर्यादीवरुन भाऊसाहेब गुट्टे यांच्यावर गुन्हा दाखल करण्यात आला आहे. दरम्यान शुक्रवारी (ता.२९) सकाळी ग्रामीण पोलीसांनी पुन्हा तालुक्यातील हेळंब येथील एका शेतकऱ्याच्या शेतात छापा टाकला असून ग्रामीण पोलीस यासंदर्भात कारवाई करत आहेत.