मराठवाड्यात आठ मंडळात अतिवृष्टी,तीन जिल्ह्यात नुकसानीचे पंचनामे

औरंगाबाद : मराठवाडा विभागात (Rain In Marathwada) रविवारी (ता.२६) दुपारी साडेबारा वाजेपर्यंत गेल्या चोवीस तासात आठ मंडळांमध्ये अतिवृष्टी झाली आहे. तसेच यंदाचा मान्सुनमध्ये झालेल्या अतिवृष्टी व ढगफुटी सदृश परिस्थितीमुळे विभागात बाधित झालेल्या १५ लाख ३१ हजार १७१ हेक्टर क्षेत्रापैकी शुक्रवार(ता.२४) पर्यंत १२ लाख ५२ हजार ३६३ हेक्टर क्षेत्रावरील पंचनामे झाले आहे. लातूर, उस्मानाबाद आणि हिंगोली (Hingoli) या तीन जिल्ह्यात १०० टक्के पंचनामे झाले आहेत. बीड (Beed) जिल्ह्याच्या चकलंबा मंडळात ७३ मिलिमीटर, नांदुरघाट मंडळात ९७ .७५, वडवणी मंडळात ८४ मिलिमीटर. लातूर (Latur) जिल्ह्याच्या किनगाव मंडळात ९७ .५०, उस्मानाबाद जिल्ह्याच्या उस्मानाबाद (Osmanabad) मंडळात ८०.५०, उस्मानाबाद ग्रामीण १०८.२५, परभणी जिल्ह्यातील पिंपळदरी मंडळात ८०.२५ तर चारठाणा मंडळात ६८.२५ मिलिमीटर पावसाची नोंद झाली आहे.

मराठवाडा विभागात अतिवृष्टीने २१ लाख ८२ हजार ७६८ शेतकरी प्रभावित झाले आहेत. त्यापैकी शुक्रवार (ता. २४ ) पर्यंत १८ लाख ५९ हजार १०७ शेतकऱ्यांच्या शेतीच्या नुकसानीचे पंचनामे झाले आहेत. आठ जिल्ह्यात सरासरी ८१.७९ टक्के पंचनामे झाले आहेत. यात औरंगाबाद जिल्ह्यात ७३.६७ टक्के, जालना जिल्ह्यात ७६ .०९, परभणी जिल्ह्यात ७९.८९, नांदेड जिल्ह्यात ९३.५८ आणि बीड जिल्ह्यात ७९.२१ टक्के पंचनामे पूर्ण झाले असल्याचे अहवालात म्हटले आहे.