Hingoli: पीकविम्याचा लाभ घेण्यासाठी अर्ज करा

हिंगोली : प्रधानमंत्री विमा योजनेचा लाभ घेण्यासाठी शेतकऱ्यांनी ३१ जुलै पर्यंत अर्ज करावेत, असे आवाहन जिल्हा अधीक्षक, कृषी अधिकारी शिवराज घोरपडे यांनी केले आहे. राज्यात खरीप हंगामात प्रधानमंत्री पीक विमा योजना राबविण्यासाठी क्लस्टरनिहाय विमा कंपन्यांची निवड करण्यात आली आहे.

हिंगोली जिल्ह्यासाठी आयसीआयसीआय-लोंबार्ड जनरल इन्शुरन्स कंपनी लि. या विमा कंपनीची निवड करण्यात आली आहे. खरीप हंगामात खरीप ज्वारी, तूर, मूग, उडीद, कापूस व सोयाबीन या पिकांना विमा संरक्षण उपलब्ध आहे. यामध्ये खरीप ज्वारीसाठी संरक्षित रक्कम ३० हजार रुपये असून, शेतकऱ्यांनी भरावयाच्या विमा हप्त्याची रक्कम ६०० रुपये आहे. सोयाबीन पिकासाठी संरक्षित रक्कम ५५ हजार रुपये असून, भरावयाच्या विमा हप्त्याची रक्कम १,१०० रुपये आहे. मुगासाठी संरक्षित रक्कम २२ हजार रुपये असून, भरावयाच्या विमा हप्त्याची रक्कम ४४० रुपये आहे. उडदासाठी संरक्षित रक्कम २२ हजार रुपये असून, विमा हप्त्याची रक्कम ४४० रुपये आहे.

तूर पिकासाठी संरक्षित रक्कम ३६ हजार ८०२ रुपये असून, विमा हप्त्याची रक्कम ७३६.०४ रुपये आहे. कापूस पिकासाठी संरक्षित रक्कम ५५ हजार रुपये असून, भरावयाच्या विमा हप्त्याची रक्कम २,७५० रुपये आहे.

प्रधानमंत्री पीक विमा योजनेअंतर्गत हवामानातील प्रतिकूल परिस्थितीत झालेले नुकसान, पीक पेरणीपासून काढणीपर्यंतच्या कालावधीत पिकांच्या उत्पादनात येणारी घट, दुष्काळ, पावसातील खंड, पूर, क्षेत्र जलमय होणे, कीड व रोगांचा व्यापक प्रादुर्भाव, भूस्खलन, नैसर्गिक आग, वीज कोसळणे, वादळ, गारपीट आणि चक्रीवादळ, नैसर्गिक आपत्ती या बाबींमुळे होणाऱ्या पीक नुकसानीसाठी विमा कवच आहे. यामध्ये स्थानिक नैसर्गिक आपत्ती व काढणी पश्चात नुकसान इत्यादी बाबींचाही समावेश आहे.

विमा पोर्टल सुरू

पीक विमा हप्ता भरण्यासाठी विमा पोर्टल (pmfby.gov.in) सुरु करण्यात आले आहे. हिंगोली जिल्ह्यातील शेतकऱ्यांनी ३१ जुलै पर्यंत मोठ्या प्रमाणात अर्ज करुन पीक विमा योजनेत सहभागी व्हावे, असे आवाहन जिल्हा अधीक्षक, कृषी अधिकारी शिवराज घोरपडे यांनी केले आहे.