हिंगोली भाजपा जिल्हाध्यक्ष शिवाजी जाधव यांचा तडकाफडकी राजीनामा

वसमत (हिंगोली): हिंगोली भाजपाचे जिल्हाध्यक्ष ॲड. शिवाजी जाधव यांनी जिल्हाध्यक्षपदाचा तडकाफडकी राजीनामा दिला आहे. प्रकृती व पक्षासाठी वेळ देता येत नसल्याने आपण राजीनामा देत असल्याचे त्यांनी स्पष्ट केले. जाधव यांनी स्वतः टोकाई कारखाना सुरु केला होता. त्यामुळे ऊस उत्पादक शेतकऱ्यांना मोठा दिलासा मिळाला आहे. त्यांच्या नेतृत्वाखाली भाजपाने वसमत विधानसभा मतदार संघातून सहा जिल्हा परिषद सदस्य निवडून आणले होते. तर वसमत पंचायत समितीवर स्पष्ट बहुमत मिळून पहिल्यांदाच भाजपचा सभापती झाला होता.

दरम्यान, विधानसभा निवडणुकीत ते दुसऱ्या क्रमांकावर राहिले होते. त्यानंतर भाजपाचे जिल्हाध्यक्ष म्हणून काम करताना त्यांनी पक्षाला चांगले दिवस आणण्यासाठी मोठे प्रयत्न केले. आता जाधव यांनी जिल्हाध्यक्षपदाचा तडकाफडकी राजीनामा दिला आहे. भाजपाचे प्रदेशाध्यक्ष चंद्रकांत पाटील यांनी त्यांचा राजीनामा मंजूर केला आहे. यासंदर्भात जाधव यांच्याशी संपर्क साधला असता त्यांनी प्रकृतीच्या कारणामुळे आपण राजीनामा दिला असून यापुढेही भाजपमध्येच राहणार असल्याचे त्यांनी स्पष्ट केले.