Hingoli News: हिंगोली-मुंबई रेल्वेसेवा लवकरच सुरू

हिंगोली : हिंगोली- मुंबई रेल्वेसेवा लवकरच सुरु केली जाईल, असे आश्वासन केंद्रीय रेल्वे राज्यमंत्री रावसाहेब दानवे यांनी दिले आहे. अशी माहिती खासदार हेमंत पाटील यांनी दिली. जिल्ह्यातील नागरिक मागील अनेक वर्षांपासून हिंगोली-मुंबई रेल्वेसेवा सुरु करण्याची मागणी करत आहेत. यासाठी अनेकवेळा रेल्वे रोको आंदोलने करण्यात आली आहेत. तसेच हिंगोली आणि वाशीम या दोन्ही जिल्ह्यातून रेल्वे मार्ग जातो.

परंतु, महाराष्ट्राच्या राजधानीशी जोडणारी एकही रेल्वे अद्याप हिंगोली जिल्ह्यातून सुरु करण्यात आलेली नाही. या पार्श्वभूमीवर खासदार हेमंत पाटील यांनी रावसाहेब दानवे यांनी विशेष बैठक बोलावून हिंगोली-मुंबई रेल्वे सेवा सुरु करावी. अशी मागणी केली होती. यानुसार केंद्रीय रेल्वे राज्यमंत्री दानवे यांनी गुरुवारी दिल्ली येथील रेल्वेभवनात महत्त्वपूर्ण बैठक बोलावली होती. बैठकीस खासदार हेमंत पाटील यांच्यासह रेल्वेचे प्रमुख कार्यकारी संचालक श्री. सिंघ (कोच) व इतर वरिष्ठ अधिकारी उपस्थित होते.(Hingoli News)

यावेळी खासदार पाटील यांनी हिंगोली किंवा अकोला रेल्वे स्थानकाहून रेल्वे गाडी सायंकाळी निघून ती दुसऱ्या दिवसी सकाळी किमान नऊच्या सुमारास मुंबई येथे पोहचावी, अशी एक विशेष रेल्वे सुरु करावी, यासह हिंगोली येथे स्वतंत्र रेल्वे पिट लाईन तयार करण्यात यावी, अशी मागणी केली होती.