आष्टी - घराचा दरवाजा तोडून आत येण्याचा प्रयत्न करत दरोडा घालण्याच्या तयारीने आलेल्या सहा जणांनी सोनेनाणे काढून द्या, आरडाओरड करू नका, अशा धमक्या देत धिंगाणा घालणे सुरू केल्यानंतर घरमालकाने समयसूचकता दाखवत परवानाधारक रायफलमधून हवेत गोळीबार केल्याने दरोडेखोरांनी तेथून पळ काढला. मात्र, गस्तीवरील ग्रामस्थांच्या सहकार्याने यातील तीन आरोपींना पोलिसांनी ताब्यात घेतले, तर तिघे पसार झाले. या प्रकरणी शुक्रवारी (ता. १६) सहा जणांविरुद्ध आष्टी पोलिसांत गुन्हा दाखल करण्यात आला आहे.