Beed Crime : कुख्यात गुन्हेगार गुन्हे शाखेच्या जाळ्यात ;दोन गुन्हे उघडकीस, सव्वापाच लाखांचा मुद्देमाल जप्त

छत्रपती संभाजीनगर : बीड जिल्ह्यातील आष्टी तालुक्यातील कुख्यात गुन्हेगार रामेश्वर जंगल्या भोसले औरंगपुरा भागात चोरीचा मुद्देमाल विकण्यासाठी आला असता गुन्हे शाखेच्या जाळ्यात अडकला. भोसलेने सिंधी सिरसगाव येथे केलेल्या दोन घरफोड्यांची कबुली देत ५ लाख ३० हजारांचा मुद्देमाल पोलिसांच्या स्वाधीन केला आहे.

सिंधी सिरसगाव (ता. गंगापूर) येथील बाळू विनायक सोनवणे यांच्या घरातून भोसलेने २९ मे रोजी पहाटे लोखंडी पेट्या लांबवत ६ लाख ७७ हजारांचा मुद्देमाल, तसेच त्यांच्या घराजवळील बाबासाहेब जगताप यांच्या घरातून ८० हजारांचा ऐवज पळवला होता. याप्रकरणी दौलताबाद पोलिस ठाण्यात गुन्हा दाखल करण्यात आला होता.

या गुन्ह्यात संशयित आरोपी रामेश्वर जंगल्या भोसले (वय २२, रा. पांडेगव्हाण गायरान, जि. बीड) याचा हात असल्याची माहिती गुन्हे शाखेचे पोलिस निरीक्षक संदीप गुरमे यांना मिळाली होती. या माहितीवरून औरंगपुरा येथे दुचाकीवर भोसले चोरीचा ऐवज विकण्यासाठी आला असता, त्याला पथकाने अटक केली.

ही कारवाई पोलिस आयुक्त संदीप पाटील, उपायुक्त प्रशांत स्वामी, एसीपी धनंजय पाटील यांच्या मार्गदर्शनाखाली पोलिस निरीक्षक संदीप गुरमे, पीएसआय संदीप साळुंके, संजय मुळे, प्रकाश गायकवाड, बाळू लहरे, नवनाथ खांडेकर, अमोल शिंदे, सुनील बेलकर, श्याम आढे आणि तातेराव शिनगारे यांनी केली. दरम्यान, आरोपीला सोमवारी (ता. १७) न्यायालयात हजर केले असता प्रथम वर्ग न्यायदंडाधिकारी एस.एस. रामदीन यांनी बुधवारपर्यंत पोलिस कोठडीत ठेवण्याचे आदेश दिले. न्यायालयात सहायक सरकारी वकील समीर बेदरे यांनी युक्तिवाद केला.गणवेशासाठी तारीख पे तारीख!