Jalna : तीन दशकांपासून समाजसेवेचा अविरत वसा

जालना : गरजू श्रमिक कष्टकरी महिलांना त्यांचे हक्क मिळावेत यासह मानवाधिकार आणि ‘विशाखा’ समिती माध्यमातून तीन दशकांपासून रसना रमेश देहेडकर यांचे कार्य अविरत सुरु आहे,हे विशेष...शहरात नवचैतन्य महिला मंडळाच्या माध्यमातून नव्वदच्या दशकात रसना देहेडकर यांनी सामाजिक कार्याचा वसा हाती घेतला.तीन दशकापेक्षा अधिक काळापासून महिलांचे प्रश्न सोडविण्यासाठी पुढाकार घेतात.सुरुवातीला नेहरू युवा केंद्राच्या माध्यमातून सामाजिक कार्यात व्यस्त राहत असत. नंतरच्या काळात जिल्हा नियोजन समितीवर सदस्य म्हणून कामाचा प्रदीर्घ अनुभव आहे.

नोकरदार महिलांच्या समस्या आणि प्रश्नांची सोडवणूक करण्यासाठी असलेल्या विशाखा समिती सदस्या म्हणून रसना काम पाहतात. शहरातील विक्रीकर कार्यालयात असलेल्या महिलांच्या समस्या निवारण समितीचे काम रसना देहेडकर पाहतात.जिल्हा शांतता समिती, स्त्री आधार केंद्र, साक्षरता अभियान असो,की इतर सामाजिक कार्यात नेहमीच पुढाकार असतो.

महाराष्ट्र राज्य अंधत्व निवारण समितीच्या जिल्हा समितीवर रसना या आजीव सदस्य म्हणून काम पाहत आहेत. सामाजिक कार्यासाठीचा महाराष्ट्र शासनाचा पुण्यश्लोक अहिल्यादेवी पुरस्काराने रसना यांना गौरविण्यात आले आहे. पुणे येथील साहित्य कलायात्री संस्था, जालन्यातील भाईश्री फाउंडेशन यासह एकता गौरव पुरस्कार रसना यांना सामाजिक कार्यासाठी प्रदान करण्यात आले आहे. सध्या महिला तक्रार निवारण समिती, मानवाधिकार संघटनच्या कार्यात रसना व्यस्त राहतात. स्त्री आधार केंद्र असो,की रेड स्वस्तिक सोसायटी अशा संस्थांच्या माध्यमातून रसना या महिलांच्या आरोग्य, शिक्षण कार्यासाठी प्रयत्न करतात.