जिंतूर : येलदरी धरणात ८३.६६ टक्के पाणीसाठा

जिंतूर : तालुक्यातील येलदरी धरणात गुरुवारी (ता. ११) दुपारी दोन वाजतापर्यंत ८३.६६ टक्के पाणीसाठा उपलब्ध झाला. पाच तारखेपासून ऊर्ध्व भागातील बुलडाणा जिल्ह्यातील खडकपूर्णा धरणातून पूर्णा नदीपात्रात विसर्ग सुरू असल्याने येलदरी धरणाच्या पाणीसाठ्यात सातत्याने वाढ होत आहे. त्यामुळे या सात दिवसांत धरणात गुरुवारी दुपारपर्यंत १२.५३ टक्के पाणीसाठ्यात वाढ झाली. ही वाढ पाहता धरण लवकरच पूर्ण क्षमतेने भरण्याची शक्यता आहे.

येलदरी धरणाची एकूण पाणीसाठवण क्षमता ९३४.४४० दशलक्ष घनमीटर असून, जिवंत पाणीसाठ्याची क्षमता ८०९.७७० दशलक्ष घनमीटर एवढी आहे. गुरुवारी दुपारपर्यंत ७९८.०९१ दशलक्ष घनमीटर पाणीसाठा उपलब्ध असून, यापैकी ६७३.४२१ दशलक्ष घनमीटर उपयुक्त पाणीसाठा उपलब्ध होता. ज्याची टक्केवारी ८३.६६ एवढी आहे.