'ड्राय डे'ला पोलिसांचे सात ठिकाणी छापे, सात जणांवर कारवाई

औराद शहाजांनी (जि.लातूर) : औराद शहाजांनी (ता.निलंगा) पोलिसांनी ड्राय डे असताना सुध्दा अवैध मार्गाने देशी विदेशी दारू विकणाऱ्या सात ठिकाणी छापे मारून सात जणांवर कारवाई करून मुद्देमाल 15 हजार रुपयांची दारू जप्त केली आहे.
आज शुक्रवार (ता.१९) दुपारी दोनच्या सुमारास औराद  पोलिसांच्या वतीने अवैध दारू विक्रीच्या विरोधात धडक मोहिम राबविण्यात आली.

यात सात ठिकाणी औराद, तगरखेड, हालगरा, कालमुगळी, अंबुलगा या ठिकाणी  धाडी मारण्यात आल्या. यात विष्णु शंकर अंतररेड्डी, अमृत माणिक सादनांदे,  सुरेश थेटे (रा.तगरखेड), राजेंद्र रामराव चिटकुटे (रा.हालगर), राजू उस्मान  मुल्ला अंबुलगा, श्रीमंत रामराजे  पोतराजे (रा.सावरी), शर्णप्पा कल्लापा आवळे (कलमुगळी) यांना अटक करून त्यांच्या विरुद्ध  औराद पोलीस ठाण्यात गुन्हा दाखल करण्यात आला आहे. सहायक पोलिस निरीक्षक  सुधीर सूर्यवंशी यांच्या मार्गदर्शनाखाली गोपाळ बरडे, सुनिल पवार आदींनी ही कारवाई केली आहे.

Edited - Ganesh Pitekar