लातूर जिल्हा बँकेची अंतिम मतदार यादी प्रसिद्ध

लातूर : जिल्हा मध्यवर्ती सहकारी बँकेच्या पंचवार्षिक निवडणुकीत जिल्हा सहकारी निवडणूक अधिकारी तथा विभागीय सहनिबंधक (सहकारी संस्था) समृत जाधव यांनी सोमवारी (ता. २७) बँकेची अंतिम मतदार यादी प्रसिद्ध केली. अंतिम मतदार यादी प्रसिद्ध झाल्यामुळे बँकेच्या संचालक मंडळाच्या निवडणुकीचा कार्यक्रम केव्हाही घोषित होण्याची शक्यता आहे. दरम्यान, यादी अंतिम झाल्यानंतर राजकीय हालचालींना वेग आला असून इच्छुक उमेदवारांनी नेत्यांचा संपर्क वाढवला आहे.

जिल्हा बँकेच्या संचालक मंडळाची मुदत गेल्यावर्षी मे महिन्यात संपली असून, त्यापूर्वी राज्य सहकारी निवडणूक प्राधिकरणाने बँकेच्या निवडणुकीची प्रक्रिया सुरू केली होती. त्यासाठी प्रारूप मतदार यादीचे काम हाती घेताच कोरोना व अन्य कारणांमुळे निवडणुका तसेच यादीचा कार्यक्रम पुढे ढकलण्यात आला. यातूनच तब्बल दीड वर्षानंतर प्रारूप मतदार यादी तयारी होऊन तीन सप्टेंबरला ती प्रसिद्ध करण्यात आली. यादीवर १३ सप्टेंबरपर्यंत दावे व हरकती स्वीकारण्यात आल्या. तब्बल ६४ दावे व हरकती दाखल झाल्या होत्या. त्यांची सुनावणी घेऊन जिल्हा सहकारी निवडणूक अधिकारी जाधव यांनी काही संस्थांच्या प्रतिनिधींना अपात्र ठरवले तर काही संस्थांच्या प्रतिनिधींची नावे नव्याने यादीत दाखल केली. यातूनच प्रारूप यादीच्या तुलनेत चार मतदारांत वाढ झाली आहे